A para e tiramentu di kabrito den Parke Nashonal Washington Slagbaai temporalmente despues di krítika for di komunidat. A primera bista ta parse ku e diskushon ta tokante kuminda ku ta dispidí, pero bou di esei tin un pregunta skondí ku tin años ta hunga na Boneiru: ken ta disidí kiko ta un maneho di naturalesa adekuá, ora naturalesa i kultura ta den konflikto ku otro?
Redukshon di e kantidat di kabritu den Parke Nashonal Washington Slagbaai tin años ta forma parti di Parke Bunita, e programa di restorashon ekológiko ku Stinapa ta ehekutando. Kabritu ta kome vegetashon hóben i indígeno, i ta forma un menasa pa e ekosistema, segun e organisashon. Stinapa su meta ta pa den aña 2030 henter Parke Nashonal Washington Slagbaai ta liber di kabritu.
70%-30%
Ta kapturá mayoria kabritu, un setenta porshento asina, bibu i ta entregá nan komo donashon na, entre otro, kriadónan di kabrito, iglesianan i fundashonnan. Mas o ménos trinta porshento di e kabritunan ta biba den áreanan difísil pa alkansá, i normalmente ta tira nan mata. Esaki a haña krítika for di e komunidat Boneriano. Muchu biaha, kadavernan tabata keda drumi den naturalesa, loke no solamente a kousa molèster di oló stinki, pero mas aun ta mirá komo dispidimentu di kuminda. Ta asina ku, pa motibu di reglanan di higiena, no por usa kabritu ku a tira mata, pa konsumo humano.
“Tin hende ku ta biba den pobresa i ta bai banko di kuminda, pues no por ta, ku ta dispidí kuminda den e parke”, diputado Dennis Martinus (MPB) tambe ta haña. Na e momentunan akí e Kolegio Ehekutivo di Boneiru ta den kòmbersashon ku e organisashon di naturalesa Stinapa tokante e tiramentu di kabritu. Konhuntamente e gobièrnu insular i Stinapa lo buska un otro solushon struktural, durante un paro di kuater siman.
Herensia kultural
Karni di kabritu ta masha gustá bou di Bonerianonan. “Tur hende na Boneiru a lanta ku komementu di karni di kabritu,” kriadó di kabritu Reginald ‘Yonchi’ Dortalina ta konta. “Tempu ku mi tabata chikitu, tabatin mas ku dos mil kabritu ta kana rònt den e kunuku di mi tawela i esei tabata konta pa nos bisiñanan tambe,” e ta kòrda. “Pa hopi tempu, Boneiru tabata asta eksportá karni di kabritu pa e otro islanan. Nos tabata e kushina di Antias Hulandes.” Entretantu Dortalina mes ta manehá e pida tereno di su tawela, kaminda un tempu e tambe a kria kabritu.
Dortalina ta konektá kabritu ku un sintimentu di siguridat (alimentaria). E ta ilustrá: “Bo yunan tin mester di sapatu nobo pa skol? Mata dos kabritu, bende e karni, i bo tin un tiki sèn atrobe pa sapatu. I si bini guera den e region, semper nos lo tin algu pa kai riba dje.” Ademas: “Karni di kabritu stobá ta kisas e kos di mas dushi ku tin. No mishi kuné!”
Ta mira kabritu i nan karni komo un parti importante di e kultura Boneriano. P’esei e konosedó di kultura Boi Antoin tin problema ku redukshon di e poblashon di kabritu. “Mi ta nota ku ta pone preshon riba nos kultura. Hulandesnan na Boneiru ta mira solamente ku e kabritunan ta kousa daño na e naturalesa, i ta bini ku regulashon nobo. Nan no ta konprondé e importansia di kabritu pa nos siguridat alimentario.” E ta chansa: “Si hamber dal aden, lo mi bai na e entiero di tur e hendenan ku no ke kome karni di kabritu.”
‘Regulashon hulandes’
Aki Antoin ta eksponé un choke entre e norma- i balornan lokal, i regulashon ku e boneriano ta sinti ku hulandesnan ta imponé. Un selekshon di e reakshonnan riba Facebook riba un publikashon rondó di e ‘diskushon riba kabritu’ ta mustra e sintimentu ei klaramente. Tin disgusto tokante e kantidat grandi di hulandes ku ta na kabes di organisashonnan importante i asina ta imponé nan ‘sistema Hulandes’, poniendo e manera di biba lokal na peliger.
Kriadó Dortalina ta rekonosé e sintimentu akí. “Pero no ta Hulanda so. E gobièrnu boneriano ta ehekutá e maneho.” E gobièrnu lokal tambe ke eliminá tur bestia ku ta kana lòs den naturalesa ta kome e vegetashon, pa 2030. Segun Dortalina, e problema ta, ku ta disidí ku akiratu mester sera tur kabritu den kurá, pero ku no ta mira kiko esei ta nifiká pa e kriadónan di kabritu na Boneiru. “E kos práktiko ku kabritu ta hustamente, ku bo por laga nan un ratu liber pa nan bai kome den mondi. Asina bo no tin ku importá kuminda bo mes,” e ta splika.
E gobièrnu lokal a perkurá pa un kompensashon pa kurá pa e kriadónan di kabrito. Pero esaki no ta sufisiente, segun Dortalina. “Na Hulanda ta relativamente barata pa alimentá kabritu. Aki no tin yerba seku, pues nos ta haña nos ta importá kuminda di bestia. Esei mi ke hasi sí, pero mester tin un kompensashon finansiero pa esei sí, si no e kriamentu di kabritu lo no ta rendabel mas.”
Impakto riba naturalesa
Pa Bonerianonan, kabritu ta inseparablemente ligá na nan isla i, ademas: “bestia mester ta den naturalesa,” Dortalina ta haña. E impakto real di kabritu riba naturalesa ta hopi mas chikitu ku loke tin hende ta pensa, tantu Dortalina komo Antoin ta haña. “Kabritu ta kome hustamente e yerba malu,” Dortalina ta indiká. “E menasa di mas grandi pa e naturalesa ta sekura.” Ta falta ke tira riba e kabritu?
No ta parse asina. Diferente investigashon di Wageningen University & Research ta mustra ku kabritunan lòs berdaderamente ta pone preshon riba e naturalesa di Boneiru. Ora bestia kome e vegetashon di mas, hopi mata i palu hóben ta disparsé, loke ta hasi ku e naturalesa no por restorá bon i e biodiversidat ta baha. Ta palu bieu so ta keda. Ora stroba kabritu, i otro bestia ku ta kome yerba, di drenta, e rehubenesimentu natural di e mondi ta oumentá konsiderablemente.
Boneiru no ta e úniko isla kaminda eliminashon òf tenementu afó di bestianan ku ta kana lòs, a yuda e matanan indígeno restorá. Den partinan di Parke Kristòf na Kòrsou a saka òf tene kabritunan afó, i na Saba for di aña 2020 a saka mas ku 90 porshento di e komedónan di yerba ku ta kana lòs, tur dos ku resultadonan positivo pa e vegetashon.
Rekonsiderando tiramentu di kabritu
Pa e motibu akí aktualmente pa Stinapa i e Entidat Públiko Boneiru e pregunta no ta, ku si nan mester para ku e redukshon di e poblashon di kabritu. Nan ta di akuerdo ku otro tokante e importansia di restorashon di naturalesa den Washington Slagbaai i e nesesidat pa baha e preshon ku e komementu di yerba di kabritu ku ta kana lòs ta trese. Sí nan ke rekonsiderá e aspekto akí di e maneho di naturalesa, a konsekuensia di e krítika ku ta keda bini riba e tiramentu di kabritu.
Stinapa i e Kolegio Ehekutivo ta investigando huntu si ta posibel, i te na ki grado, pa oumentá e porsentahe di karni usabel. “Stinapa ta kompletamente habrí pa solushonnan práktiko pa usa un parti mas grandi di e bestianan akí na un manera responsabel,” e organisashon di naturalesa ta deklará. Diputado Martinus ta enfatisá: “Nos ta pone nos emoshonnan un banda, pero kedando krítiko en buska di un solushon ku ta lo mihó pa e isla.”
Stinapa ta bisa di ta realisá su mes bon ku kabritu tin un lugá importante den historia, kultura i tradishon kulinario di Boneiru. “Na mes momento nos tin, komo manehadó di naturalesa, e responsabilidat pa protehá Washington Slagbaai. P’esei nos ta kontinuamente en buska di maneranan pa kombiná restorashon di naturalesa ku rèspèt pa e komunidat, bienestar di bestia i e nifikashon kultural di kabritu na Boneiru.”
Sin embargo e pregunta ta, ku si ku esaki ta duna sufisiente oido na e pregunta: ken ta disidí kiko ta bon maneho di naturalesa riba un isla kaminda e kabritu ta tantu un problema ekológiko komo un herensia kultural stimá?
