DELFT – Preis di sali keiru henter un dia na Hulanda a subi basta último añanan. Esaki a sali for di sifra resien di CBS. P’esei pa míles di famia hulandes ku ta biba den pobresa e temporada di fakansi ta un reto èkstra.
Daidelyn* (31) di Kòrsou ku ta biba na Delft sa tur kos di esaki. Komo mama soltero di tres yu (di 12, 10 i 4 aña) e mester biba di 40 euro pa siman. E Stadspas, ku ta duna hende ku tiki entrada akseso grátis na museo, landa i teatro, lo mester ofresé un solushon. Pero den práktika esaki no t’asina tur ora.
Stadspas
“E parke di rekreashon Duinrell ta grátis ku un Stadspas asina, pero mi mester por yega na Duinrell si, i esei ta kosta sèn pa bùs, trein i trèm”, Daidelyn ta splika. Ta nèt e preisnan ei segun e sifranan di Ofisina Sentral pa Estadístika (CBS) a subi ku 11 porshento kompará ku yüli 2014. Den kaso di e famia di Daidelyn por ehèmpel bai Delft – Duinrell bini bèk ku deskuento ta sali 25 euro. Mas ku mitar di su bùdjèt di siman.
Den ki sentido sali keiru un dia òf un vakashon ta algu bon i nesesario? Segun investigadó Marcel Warnaar di Instituto Nashonal di Informashon di Bùdjèt (Nibud) esaki no ta komparabel ku e nesesidat di kuminda i un kas pa biba aden, pero ta ‘apsolutamente importante pa hende por partisipá sosialmente’. “Pobresa hopi bia ta kana huntu ku eksklushon sosial, p’esei partisipashon na komunidat ta importante, maske ta djis pa lubidá bo prekupashonnan un ratu”, Warnaar ta bisa.
Bida sosial
Daidelyn diariamente ta eksperensiá e impakto di pobresa riba nan bida sosial. Tambe den kos simpel manera un invitashon di bisiña. “Mes ora mi ta kuminsá konta sèn i hopi bia mi mester nenga pasobra finansieramente no ta posibel. Mi no ke ta un molèster tampoko pa otro hende.
Un spiral ku Calvin Ceder tambe ta mira regularmente serka algun di su klientenan. Ku su Anti Incasso Ceder entre otro ta empeñá pa hende ku ta haña nan mes perhudiká pa kreditor pasobra esakinan ta kobra gastu haltu sin tin nodi.
Vakashon
“Mi klientenan durante hopi tempu ta biba den un modo di sobrebibensia. Meskos ku pa otro hende, fakansi di zomer pa nan tambe ta un temporada pa rekargá. Si esaki no por sosodé pasobra no tin sèn, òf pasobra a pone beslag riba e sèn di vakashon, bo ta mira ku nan ta pèrdè ánimo i tin bia asta ta kai den un depreshon.
Tambe Ceder ta haña ku ‘tantu kreditor komo ousiliante, pero tambe hende ku tin problema finansiero, ta kompartí un responsabilidat pa buska un solushon pa e problema sosial aki’. “Ku esaki nos por inspirá polítika tambe i motivá pa traha un maneho apropiá.”
Posibilidat
No opstante e situashon tristu tòg Daidelyn ta mira posibilidat tambe pa su famia. “Ora wer ta bon mi ta sali ku e muchanan i un klechi bai sinta na un dijk òf un lago chikí. Nos ta hiba pan i kos di bebe for di kas. Òf nos ta tene un dia di hunga wega na kas mes.
(*) Daidelyn su nòmber kompleto ta konosí na redakshon