WILLEMSTAD – Mas y mas hende na Corsou ta lucha contra pobresa sin fin. Diferente organisacion cu ta duna ayudo ta mira cu nan tin mas trabou riba e isla, pero tambe cu na Hulanda e cantidad di hende di Corsou den pobresa cu nan mester yuda, ta creciendo.
Programanan di ayudo di gobierno di Corsou ta enfoka mas tanto riba e barionan Montaña, Otrobanda, Barber y Buena Vista. Pero tin mas organisacionnan cu ta activo diariamente riba henter e isla pa yuda hende pober. Nan ta mira cu tin mas pobresa cual ta manifesta den diferente forma.
Pobresa scondi
“No tur ora e ta facil pa detecta pobresa”, Jeanett Juliet-Pablo ta splica. E ta president di e iniciativa Unidad di Bario. “Awendia nos ta papia di working poor, hende cu tin un of mas trabou pero nan entrada no ta suficiente pa paga nan gastonan fiho.” Cu hendenan asina bo no ta mira di biaha cu nan ta luchando contra pobresa.
“Bo tin diferente categoria di pobresa. Bo tin pobresa extremo, pobresa relativo y bo tin hende cu structuralmente tin tiki placa y mester lucha pa sobrevivi.” Nan no ta tene cuente suficiente cu e hendenan den e ultimo categoria, segun Juliet-Pablo.
Migracion di pober
E aumento di pobresa na Corsou tambe por sinti na Hulanda. Evelyn Martier di Parlan Jeugdzorg na Den Helder ta ripara cu tin mas hende di Corsou ta bay Hulanda sin niun preparacion. Tur aña e instancia di cuido hubenil ta duna guia na casi 5000 mucha, hoben y nan famia.
Mayoria di hende di Corsou ta bay Hulanda pa motibo di e ‘mal circunstancianan economico, financiero y tambe social riba e isla’, segun Martier.
‘Den casonan extremo tin mayornan cu ni por cuida nan yiu’
“Pero nan ta bin Hulanda sin preparacion y cay den problema. Den casonan extremo tin mayornan cu ni por cuida nan yiu mas y nan ta pone nan bou supervision di cuido hubenil.”
Pa evita cu hende di Corsou ta busca un miho bida na Hulanda sin preparacion adecua, mester bin mas posiblidad di trabou na Corsou mes, asina Martier ta haya.
“Hende ta conta mi cu nan ta bay Hulanda pasobra nan a perde nan trabou, no pa bin biba dushi aki banda.”
