WILLEMSTAD – Lo kita un total di 1900 meter kuadrá di mangel di awa for di e parke di mangel di awa den e área di Ref. Esaki Jason Obispo, bosero di e proyekto Ref di Ministerio di Tráfiko, transpòrt i Planifikashon Espasial (VVRP), ta konta.
Segun Obispo mas despues lo kompensá tur mangel di awa ku a kap i dùn. E planifikashon ta pa den e área traha dos parke nobo riba isla chikí ku boske di mangel di awa di mil meter kuadrá kada un.
Eksperto di mangel Ryan de Jongh ta prekupá pa e proyekto. Segun e ta kosta minimalmente 12 aña promé ku e mangelnan tin e mesun tamaño ku e palunan ku ta kap aktualmente.
E trabounan pa desaroyá e área di Ref hasié un área di rekreashon entre tantu ta aden kaba tur ku tin. A sera un parti grandi di e tereno kaminda e hotèl nobo Courtyard Marriott mester bini i ku esaki tambe e kaminda ku ta konektá Cruise Terminal na Mega Pier ku e rotònde na Pater Euwensweg.
Na banda di Megapier entre tantu e kompania hulandes Heuvelman Ibis ta okupá ku kapmentu di un parti di e boske di mangel di awa pa hasi remodelashon di e área posibel.
Portrèt: Ret Karibense
Hopi shushi
Aktualmente e boske di mangel di awa ta masha shushi pasobra añanan largu awa shushi di e riol di Pater Euwensweg a basha den e mangelnan. “E trabounan pa kombatí e bashamentu di awa shushi aki den e boske di mangel di awa den e área di Ref ta kuminsá na novèmber”, Obispo ta konta. Ora para e bashamentu aki por kuminsá sana e área. Segun Obispo e kontratashon pa remplasá e instalashon di pòmp awa i drechamentu di e pipanan di riol ku ta bai e instalashon di limpia awa, lo habri na sèptèmber 2019.
Segun VVRP e ora ei e trabounan por kuminsá na novèmber di 2019. Ta ferwagt ku e trabounan lo dura mas o ménos un aña.
Kondishonnan di Corendon
Sanashon di e parke di mangel di awa tabata un di e kondishonnan di e hotèl nobo di e organisashon di biahe Corendon, ku ta konstruí banda di e parke di mangel, pa habri. E planifikashon tabata pa esaki sosodé na desèmber di 2019.
Pero tantu e planifikashon pa sana komo e planifikashon di Corendon pa habri, a move pa aprel di 2020. E promé fase di e trabounan di sanamentu lo mester a kaba e ora ei.
Segun Atilay Uslu, CEO di e hotel nobo di Corendon e posponementu di e apertura di e hotèl, ku e nòmber apropiá ‘Corendon Mangrove Beach Resort’, no tin nada di hasi ku e trabounan retrasá di VVRP.
Trahadó lokal
“E motibu ku nos mester a posponé e apertura ta pasobra nos ke pa nos hotèl traha ku trahadó lokal. P’esaki mester re-eduká i trein hopi hende. Esaki ta tuma mas tempu ku a planeá”, segun Uslu.
E desaroyo di e área di ref ta konsistí di dos fase. E promé fase ta e kombatimentu di e bashamentu di awa pa asina kuminsá e sanamentu. E di dos fase ta e remodelashon di e paisahe di e parke di mangel di awa. Segun Obispo e dos fasenan aki lo kore paralèl.