KRALENDIJK – Tin un tempu di espera largu pa kas popular pa hür. Añanan largu e korporashon di kas popular Fundashon Cas Bonairiano (FCB) no por a traha sufisiente kas. Hende ku tiki moda tin bia mester warda mas ku sinku aña. I esei ta trese mas pobresa i problema sosial.
“Skandaloso”, Marionela Josephia di e Asosiashon di Hürdó di kas popular ta haña. “Tin hopi hende ku tur luna mester skohe entre un dak riba nan kabes òf kuminda riba mesa.” Ku e preisnan haltu di hür hopi hende no por paga e hür kada luna. Un otro opshon, manera biba mas barata òf muda pa un kas di hür popular no tin, pasobra e listanan di espera pa esaki ta muchu largu.
Kordinadó Integrale Wijkontwikkeling (Desaroyo Integral di Bario), Jona Chirino ta rekonosé e problema. Segun e esaki asta ta e problema sosial di mas grandi na Boneiru; kas pagabel. Mas i mas e ta mira ku hende ta skohe pa bai biba serka otro den kas. Asina den un kas pa seis persona tin bia tin tin asta diesdos hende ta biba.
“Nan ta drumi den kada huki i skina di e kas”, Chirino ta konta, “i esaki no ta un situashon deseabel. Asina énsèst ta kuminsá, asina kriminalidat ta kuminsá i asina tambe guera entre e famianan ta kuminsá. E situashon aki ta kousa diferente konsekuensha di pobresa.”
Fundashon Cas Boneriano, e fundashon di kas popular ku mester pèrkurá pa kas di hür sosial, ta splika ku e último 4 añanan i mei nan no por a konstruí kas nobo aserka.
“Nos tabata trahando pa haña finansiamentu pa esaki. Pa diferente motibu esaki a dura muchu largu. Asina nos no ker a fia sèn na un interes muchu haltu, sino e preisnan di hür lo bira muchu haltu”, Ben Oleana, direktor di FCB ta konta. “Na final nos a sera un akuerdo ku Hulanda i nos por a fia un parti nos mes.”
Segun Oleana anualmente 480 hende ta inskribí pa un kas di hür sosial. “Esaki ta hopi mas ku ántes. E kantidat di habitante na Boneiru a krese eksplosivamente último añanan kousando ku awor strukturalmente nos tin muchu poko kas.”
Awor nan a kuminsá ku e promé fase, konstrukshon di diesseis kas di hür sosial. E promé kasnan segun e direktor por entregá na febrüari 2020. Henter e proyekto lo dura 6 aña.
Supsidio di hür
E grupo di hende ku tin e molèster di mas grandi di esaki ta e hendenan ku no por paga nan hür aktual mas i ku ta pará riba e lista di espera pa un kas di hür sosial. For di promé di yanüari 2020 lo ehekutá medida nobo kaminda hende ku ta den un kas sosial kaba, por haña supsidio di hür segun nan kapasidat finansiero. “Esaki ta un paso padilanti grandi”, Oleana ta haña.
E hendenan ku aktualmente ainda ta hür privá i ku tin difikultat pa paga nan hür, mester warda un aña mas. For di 2021 numa nan por kleim supsidio di hür.
