Foto: Ariën Rasmijn
ORANJESTAD — Ta parse cu henter departamento di Landslaboratorium ta bay cay victima na cortamento di gasto di Gobierno di Aruba. Trahadornan a haya notificacion cu den lunanan cu ta bin ta bay kita tur contractant.
Locual ta pasando na casi tur departamento. A pesar di esaki. minister Alex Schwengle di Salubridad Publico lo kier purba tene Landslaboratorium habri, mirando e funcion importante cu e tin den cadena di cuido.
Ariën Rasmijn den combersacion cu contractant Vivian Werleman
Payslip
Mescos cu na diferente departamento, contractantnan na Landslaboratorium no a haya niun tipo di notificacion di nan retira di antemano. “Nos a djis wak riba e payslip di nos salario cu tur cos a wordo paga “, asina contractant Vivian Werleman ta splica.
E ta conta cu e luna aki ya caba ta kita cinco trahado cu ta riba contract. Den lunanan cu ta bin ta bay kita dos cada biaha. E idea ta pa kita tur 25 trahado riba contract for di Landslaboratorium. “Esaki lo nifica cu lo no ta bay tin hende pa saca sanger mas y cu lo mester sera e luga aki”, segun Werleman.
Companianan priva
E unico opcion cu ta resta unabes cu sera Landslaboratorium, ta e dos companianan priva cu ta haci servicio di laboratorio na Aruba. E noticia obviamente a cay duro. “No ta bay tin nada mas, pero nos debenan si ta keda. Y tin di nos tabatin dies of ocho aña trahando.” Werleman mes tabata traha seis aña largo riba contract, y tambe lo mester bay. “Bo traha cu no mucho gana, pero bo no ta hacie pa bo mes. Bo ta hacie pa pashent. Nan ta esnan cu ta malo pafo. Pues bo ta sigui traha te na unda por.” Landslaboratorium ta atendo alrededor di 100 persona diariamente.
Autor: Ariën Rasmijn