KRALENDIJK – Aki dos luna ta dies aña pasá ku Boneiru a bira un munisipio ekstraordinario di Hulanda. Ounke awendia tin ménos protesta skèrpi kontra e kambio estatal, ainda tin bòrchi kantu di kaminda ku lema manera ‘Stòp apartheid hulandes’.
Tokante e pregunta kon e boneriano i e hulandes oropeo ta eksperensiá e situashon aktual, e opinionnan ta diverso:
Por Marit Severijnse e Nathaly Evertsz-Ipcedencia
E boneriano Sharon de Palm ta haña ku kuido di salubridat i empleo na Boneiru a mehorá. Segun e pobresa na e isla tambe por pasa. E ta haña si ku ta un desbentaha grandi ku e isla ta atraé mas turista i ku Hulanda ‘no tin komprenshon’ pa kultura boneriano.
Algun meter mas aleu, un trahadó lokal ta konta ku tin pobresa ku ta hasi doló na e isla i ku no tin sufisiente trabou pa e habitantenan lokal. E ta enfatisá espesialmente e sintimentu ku no ta trata e boneriano igual.
Amargura
Dos kos ta hala atenshon: desunion ta reina i e sintimentu di desigualdat t’ei na tur dos banda. E bonerianu ta sinti su mes komo un minoria riba su propio isla, miéntras ku e hulandes oropeo ta sinti ku no ta asept’é. Ounke esnan ku a puntra ta skohe nan palabranan ku kuidou, por ripará e amargura. “Ma nase na Hulanda pero for di mi di seis aña mi t’aki. Tòg nan ta bisa mi bai Hulanda bèk”, Therese Rosier ta bisa.
Protestanan skèrpi for di 10-10-‘10
E grupo di protesta Nos Ke Boneiru Bèk ya kaba tin añanan ta protestá kontra e státùs di Boneiru komo munisipio di Hulanda. Nan ke pa Boneiru haña státùs outónomo, manera Kòrsou i Sint Maarten. Esei lo ke men ku Boneiru por skohe un propio gobièrnu lokal.![]() Marcha di protesta na 2014 / Potrèt di archivo: Belkis Osepa |
E solushon parse simpel: “Bo mester respetá otro, no mas, no ménos”, e komersiante Marco ta bisa. E ta un hulandes oropeo ku tin 26 aña ta biba na e isla. Bo ta bini aki i bo ta biba bo bida. Bo ta adaptá i no kontrali.”
Munisipio ekstraordinario
Riba 10 di òktober 2010 Antia hulandes a stòp di eksistí komo pais. E ora ei Boneiru a bira un munisipio ekstraordinario di Hulanda, huntu ku Saba i Sint-Eustatius. E tres islanan aki huntu ta forma Hulanda Karibense i nan tin un gezaghèber i diputado i por lo demas ta kai bou di legislashon hulandes. E aña aki ta dies aña pasá ku Boneiru a bira un parti di Hulanda. |