Nozai Thomas – potrèt: Belkis Osepa
KRALENDIJK – Hopi hende ta mir’é komo un hòmber ku tabatin e bon sueltu ku despues di a kai será kuater aña pòrnada a haña un suma di kasi 490 mil euro. Pero e kaso Spelonk a duna bida di Nozai Thomas un direkshon inesperá.
E ta haña ku pa motibu di e kondenashon inhustu, a hòrta su futuro. “Asta si bo ta sintá bou di un palu bo ta liber. Ami tabata será i mi no por a bai niun kaminda. Plaka nunka no por kompensá esaki.”
Belkis Osepa ta papia ku Nozai Thomas
Nozai Thomas (28) ta sinta na kas riba sofá sosegá di dje ta wak un kanal merikano na televishon. E motor di su akuariùm ku piská ta zona poko-poko. Banda di e sofá tin un krek abou na suela. Pa motibu di un aksidente na trabou e tin kuater luna kaba na kas. Riba su mes un bista basta normal. Pero su bida no tabata niun tiki normal te awóraki. Thomas: “Mi bida tabata berdaderamente manera un sine.
Eror
A kondená kuater hòmber pa e asesinato dòbel riba dos ruman hòmber na aña 2005. Despues di esfuerso i investigashon di sikólogo Lucio Ricardo i un investigashon hudisial nobo bou di maneho di abogadonan Knoops, a habri e kaso Spelonk atrobe. Dos di e kondenánan – Nozai Thomas i Andy Melaan – a haña apsolushon despues ku nan tabata será pòrnada repektivamente kuater aña i mei i ocho aña. Na april a aloká nan indemnisashon.
Nozai Thomas ta papia sosegá, pero de bes en kuando bo ta tende e emoshon den su bos ora e papia di su futuro i su yu muhé chikitu. E kaso Spelonk tabatin un impakto grandi riba su bida. Un perkanse ku el a vense hurídikamente, pero ku a laga sikatris atras.
Libertat
Thomas: “Awor sikiera mi por traha un kas pa mi yu. E ta habri porta pa mi pasobra mi no ta haña un fiansa na banko. Pero plaka no ta tur kos. E no ta kompensá loke nos a pasa aden. M’a pèrdè mi libertat. Nò, mi no por alkansá nunka mas. Mi no tin diploma di skol, mi no tin nada! Mi no por a studia. Kisas lo mi tabata un otro hende awe. Un piloto òf asta un polis.”
Nozai Thomas ta mira e kaso Spelonk komo un lucha pa bèrdat. E ta spera ku e kaso lo sirbi komo ehèmpel pa otro kaso den Karibe ku ta kore riesgo pa bai malu hurídikamente. Thomas ta kere ku mas eror hurídiko lo sali na kla. “Mas hóben ta bini dilanti i bisa ku kos ta bai malu.” Abogado Gerard Knoops den pasado a boga pa lanta un fondo pa hende ku a kondená inhustamente, ku mester finansá investigashon forénsiko den kaso ku posibelmente ta resultá den eror hurídiko.
Pia
Nozai Thomas a bolbe hañ’é konfrontá ku un kontratempu. Na februari un kashi di koriente di 500 kilo a kai riba su pia. Despues di e operashon e mester revalidá. Thomas ta sinti su mes sin poder. E no por hasi masha kos i espesialmente e no por hunga ku su yu muhé chikitu manera antes i his’é.
Pero e ta trahando riba su forsa di boluntat pa perseverá. E ta apliká loke el a siña den prizòn. “Mi ta ta adaptá. M’a sinta kuater aña, ma no t’asina ku tur dia mi tabata kuminsá yora. Mi mester a adaptá ounke ku mi tabata sa ku mi no tabata pertenesé einan.”
Outor: Belkis Osepa