ALMERE – Mester bini hopi mas estatua di hende di koló. Esaki e artista Patrick Mezas, ku tin un tayer na Almere, ta bisa. E ta bai traha e estatua di èks kampion di landamentu Enith Brigitha (65) ku a nase na Kòrsou i ku ya pa añanan largu ta biba na Hulanda.
E antiano Mezas ta traha e estatua na petishon di e aktor i trahadó di programa Mo Hersi, kende ku un akshon di crowdfunding a haña sigur 18 mil euro. E meta inisial tabata 16 mil euro, pero e suma ei Hersi a haña kaba for di un siman promé ku e dia final planeá djasabra 19 di desèmber.
Outor Sam Jones
Mezas ta kòrda Brigitha di ántes, tempu ku ya kaba e tabata landa den kompetishon internashonal. “Komo mucha nos tur na Kòrsou tabata wak televishon pa mira kon e lo a gana di e alemannan”, Mezas ta bisa entusiasmá. Tòg Brigitha na 1976 na Weganan Olímpiko na Montreal no a gana oro sino bròns. “Esei tabata pasobra e alemannan oksidental no tabata ‘clean’. Nan tabata haña doping i asina nan a gana di Brigitha.
‘E so kontra henter un tim’
Mezas ta orguyoso i kontentu ku e por traha e estatua di Brigitha. “E tabata un amatùr chikí di un isla asina chikí, ku tabata lucha kontra e grandinan ku tabatin henter un tim rònt di nan. I tòg, su so, el a alkansá di tres lugá.”
Mezas ta haña straño ku Brigitha ta mas konosí den eksterior ku na Hulanda. E mes a yega di traha estatua di mas hende di koló. Di polítiko konosí te hóben. Hende ku ta un bon ehèmpel pa sigui. Lo mester tabatin hopi mas di nan pasobra bo no ta mira nan. “P’esei pa mi ta un honor di traha un estatua di Enith.
Estatua di akshon
Ounke ainda no ta kompletamente sigur si e estatua lo bini mes. Mezas ta preparando kaba. Lihé lihé e ta pone un saku di plèstik skur riba e diseño i e ta pon’é den un skina di su tayer. “Mi a hasi un estudio kaba di dje pero mi no por konta ainda kiko e ta bai bira.” Di tur manera e lo bira un estatua aktivo di un èks kampion di natashon.
E estatua di Brigitha mester para na un sitio kaminda hende ta mir’é. No den un parke te patras den un bario na rant di Almere, Mezas ta haña. Pero orguyoso i firme, di koper, i na un sitio prominente. Mezas ke pone e kampion di natashon hulandes kurasoleño den proksimidat di awa. “Mei mei den Almere ku bista riba Weerwater.”
