WILLEMSTAD – 24 partido polìtiko, di kua 14 partido nobo a entregá nan lista di kandidato pa partisipá na elekshonnan di Parlamento, dia 19 di mart awor. Di e total di 24 partido ku a entregá lista, 17 partido mester partisipá na e pre-elekshon dia 30 i 31 di yanuari. Durante dje pre-elekshon , e partidonan mester haña minimalmente 789 firma di sosten pa por haña derecho pa tuma parti na elekshon di mart.
Pa por kumpli mihó ku e eksigensianan pa kombatí Covid 19, Konseho Supremo Elektoral, a move su ofisina temporalmente pa World Trade Center, kaminda e entrega di lista a tuma luga. Kontrali na añanan anterior, e aktividat a tuma lugá sin e folklor tradishonal di entre otro músika.
Serka prinsipalmente e partidonan nobo tin un ambishon grandi pa ‘reskatá’ Kòrsou for di e problemanan sosial i ekonómiko, miéntras ku e aktual partidonan di koalishon, ta pidi pueblo un oportunidat pa kontinuá ku e trabou desplegá durante e último kuater añanan.
Lo Martines (KEM)
Partido Kòrsou Esun Miho (KEM), un partido nobo di Michelangelo ‘Lo’ Martines, ta opiná ku e koalishon aktual no mester haña ningun chèns mas. Prinsipalmente PAR, por lo pronto mester keda leu. Segun Lo Martines, lider polítiko di KEM, e popularidat di su Partido ta hopi grandi, prinsipalmente serka habitantenan ‘pabou di brùg’. E inhustisia ku e komunidat ménos previligiá ta eksperenshá, ta e motivashon prinsipal di KEM pa partisipá na elekshon.
Lo Martines
E salbashon di Kòrsou ta pa bira munisipio di Hulanda, pero no segun e mesun kondishonnan ku Boneiru. Esei ta posishon di otro Partido nobo ‘Kòrsou Un Munisipio Ulandes Nobo ‘(KUMUN). Un referendum pa logra esaki, ta un dje promé kosnan ku KUMUN ta aspirá pa hasi, si e drenta den gobièrnu.
Poekie Alberto
Sanger nobo den polítika
Kòrsou Vishonario (VISHON) tambe ta un Partido nobo, ku ta konvensí ku e ta drenta gobièrnu. Miles Mercera, èks direktor di Curaçao Tourist Board, ku a retirá pa kuminsá un karera polítiko, ta referí na e lista di Vishon, komo sanger nobo den polítika. Tin profeshonalnan hóben i tambe un generashon nobo. Enseñansa i Ekonomia, ta puntonan di interes grandi di Vishon. Retiro di un dje kó-fundadónan di Vishon, den persona di Monte, algun dia pasá, no a kibra moral di e Partido, Mercera ta splika.
Partidonan KUMUN, KEM I VISHON, ta tres dje partidonan ku mester pasa den e proseso di pre-elekshon.
Pueblo Soberano a bira mas chiki
Partido Pueblo Soberano, di e lider politiko asesiná, Helmien Wiels, a entregá un lista di kandidato di 10 persona. Den su mihó tempu, Helmien Wiels a kondusí Pueblo Soberano na viktoria ora ku el a gana elekshon na 2012 i bira e partido di mas grandi Korsou. Despues di asesinato di Helmien Wiels, e partido a pèrdè hopi popularidat.
Segun Ben Whiteman, lider di Pueblo Soberano, e partido a pasa den hopi turbulensia, pero e partido ta rekuperando.
Ben Whiteman
E siman aki Korte Supremo a kuminsá un proseso di dos siman pa trata e kaso di apelashon di George Jamaloodin, kondená na 26 aña di prizòn, komo e asesino intelektual di Helmien Wiels.
Team PAR
PAR ke sigi
No opstante di resistensia di sierto partido pa traha ku PAR, e lider di PAR, Eugene Rhuggenaat ta deseá pa regresá komo promé minister di Kòrsou, pa sigui ku e trabou, PAR a traha un lista ku ta refleha nos komunidat , Rhuggenaath a splika.
Premier Rhuggenaath
Eugene Rhuggenaath ta opiná ku 26 partido ku ke partisipá na elekshon ta un ehèmpel di demokrasia bibu. “Pero di otro banda e ta ilustrá ku nos ta fragmentá”. Ta p’esei segun Rhuggenaath si e regresá komo promé minister den gobièrnu, e ta primintí di traha riba mas union den nos komunidat. ‘Loke ku ta separá nos for di otro tambe lo haña atenshon”, Rhuggenaath ta sigurá.