Na e edifisio di e organisashon di kuido na kas Carin Cares na Kòrsou awendia ta sinti holó di kòfi. Hóben kasi adulto ku un limitashon intelektual aki ta sirbi e wéspetnan di Café Magic. Esaki ta nan oportunidat pa un trabou den hóreka.
Na Kòrsou esaki ta ekstraordinario. Pasobra esaki ta un grupo di hende ku mayoria bia ta no tin un chèns si ta trata di trabou pagá. “Nos meta ta pa na Café Magic nan desaroyá komo empleado ful”, e tumadó di e inisiativa Carin Bult ta bisa. “Esei mester ta posibel. Pero sí bo mester tin e pasenshi i e espasio pa strukturá esaki na un manera trankil.”
Fundashon Café Magic, despues di dos aña di preparashon, na yüni a start ku 6 stazjèr fiho i dos sustituto. Fundashon Kontakto a skrin e kandidatonan. E asosiashon di mayor Totolika a lanta Kontakto i ta kuida e manera di pasa dia pa e grupo aki na Kòrsou. “Nos ke pa e hóbennan ku kuminsá serka nos tambe berdaderamente ta bini na remarke pa sigui”, Bult ta konta.
E idea ta pa un stazjèr despues di nuebe luna pa un aña drenta den servisio serka e café-restorant. Es ku tin sufisiente eksperensia komo empleado despues por kuminsá traha na un otro sitio di hóreka na e isla. Ta importante pa nan sigui bai otro kaminda pa asina duna mas tantu hende ku un limitashon intelektual un oportunidat pa trabou.
Haf seif
Chanella la Cruz ta manager di Café Magic i e ta guia e stazjèrnan. El a traha pa Kontakto kasi shete aña. E konosé e hóbennan masha bon i sa eksaktamente kiko nan ta haña difísil i kiko ta pone nan bira tur aribabou. “Nan tur gusta traha. Ta importante pa nan sinti nan mes seif.”
E ta mira kon e stazjèrnan despues di un luna kaba tin mas kontakto ku e bishitantenan. “Nan ta konta mas tokante nan mes i nan ta sinti nan mes mas sigur. Kisas e servisio ta un tiki diferente diferente di loke ta kustumber, pero e sonrisa riba nan kara ta presioso.”
Manager La Cruz tur dia tin yudansa di un boluntario. “”Coaching ku man riba lomba” e tumadó di inisiativa Bult ta yama esei. “Manera: no lubidá di sirbi na man drechi, kisas e hendenan na e mesa ei ke bebe algu mas, bo a hiba ko’i bebe ei, puntra nan si nan ke kome algu.”
Barista
E stazjèrnan ta haña un kompensashon. “Algu ku nan por ta orguyoso di dje”, Bult ta haña. “Nos tambe ta ferwagt algu. Nan mester siña hopi: sirbi, papia ku e wéspetnan, traha un kòpi kòfi.” E hóbennan ta desaroyá masha lihé. “Nan ta super motivá.”
E kumbre apsoluto ta e treinen di barista. Ku e suministradó di kòfi a ofresé kompletamente grátis. “Ora Quincy drenta aki mes ora tin fiesta”, Bult ta bisa. Stazjèr Tahusha Martis ta bria ora e konta di e treinen. Tabata basta difísil pa siña traha ku e mashin di kòfi, pero awor Tahusha ta traha un cappuccino sabroso sin problema.
Café Magic a kuminsá ku un menú chikí ku kòfi, te, sòft, pastechi i krokèt. Poko poko ta amplia e menú ku kada bia un item nobo estilo desayuno i lùnch, manera un tòsti, ‘wrap’ òf pan ku belèg. E ora ei ta bon ku tin un kòki tambe den kushina. E fundashon ta pensa riba un persona penshoná i ku gusta guia e hóbennan aki.
Bult ta bisa ku mésora su inisiativa a haña hopi sosten di hende privá i organisashon, entre nan Rotary Club Curaçao i Samenwerkende Fondsen. “No tin algu manera esaki i ta mira e importansia. Tin poko posibilidat pa adulto hóben ku un limitashon mental. E hendenan aki meresé un oportunidat.
