E elekshonnan pa parlamento oropeo ta serka i Kenville Kleinmoedig, ku a nase i lanta na Kòrsou, ta e úniko kandidato antiano ku ta partisipá na e elekshonnan aki. Ku su mensahe “Oropa tei pa nos tambe” e ta trata di trese e interesnan di Hulanda Karibense dilanti na tantu Den Haag komo Brussel. Riba djaweps 6 di yüni por vota, i Kleinmoedig ta spera di haña voto di preferensia.
Kleinmoedig a bira aktivo polítikamente durante su tempu komo studiante na Rotterdam. Su embolbimentu a kuminsá ku un eksperensia personal na Kòrsou.
Tempu ku e tabatin diesun aña di edat, semper e tabata mira un señora sinta na Punda ora ku e tabata bai pela. A resultá ku e señora pèrdè su partner i yunan den un aksidente di outo. Su situashon a afektá Kleinmoedig hopi, i el a skibi gobièrnu un karta pa pidi yudansa pa e señora.
Diferensia
Djis despues via un instansia el a haña yudansa i por a strukturá su bida atrobe. “Esei tabata e momentu ku mi a realisá ku gobièrnu berdaderamente por hasi un diferensia”, Kleinmoedig ta bisa.
E eksperensia aki a forma e base pa su ambishon polítiko. Durante su estudio na Rotterdam el a empeñá aktivamente pa interes di studiante i el a bira presidente di e konseho konsultivo di kogestion di Hogeschool Rotterdam.
“Durante mi estudio mi a siña ku embolbimentu i representashon ta esensial”, e ta splika. Su karera polítiko a haña forma mas aleu ora ku el a bira lider di kampaña di e partido polítiko GroenLinks na Rotterdam, kaminda el a partisipá na vários elekshon, entre nan pa Tweede Kamer, Provinciale Staten i elekshonnan munisipal.
Polítika oropeo
Su interes den polítika oropeo a sigui oumentá pa medio di su estudio master den European Governance. “Mi a realisá ku e desishonnan ku ta tuma na Brùsel tin un impakto direkto riba nos islanan”, Kleinmoedig ta bisa. E konvikshon aki, kombiná ku su eksperensia i pashon pa representashon, a kondusí na e echo ku el a disidí di pone su mes kandidato pa Parlamento Oropeo. “Mester tende nos bos na e nivel di mas haltu”, e ta enfatisá.
Segun Kleinmoedig e islanan karibense na diferente manera ta probechá di UO (Union Oropeo) pero e abitantenan no ta realisá tur ora kuantu influensia UO tin riba nan bida diario. “Nos ta probechá di proyekto di infrastruktura i programa di energia solar. Ademas nos a haña bakuna danki na sosten di Union Oropeo”, e ta enfatisá.
Bishita na Boneiru
Kleinmoedig aktualmente ta riba kampaña di elekshon i poko tempu ei a bishitá Boneiru. “Tabata un eksperensia instruktivo”, e ta konta.
“Mi a papia ku diferente organisashon i mi a ripará ku tin hopi trabou ku ta boluntario ta hasi. E kombersashonnan a reforsá mi konvikshon ku UO por hunga un papel mas grandi den sosten di e komunidatnan aki.” El a papia entre otro ku STINAPA, e organisashon di konservashon di naturalesa di Boneiru, i Jong Bonaire, un organisashon di hubentut ku ta ofresé aktividat i guia na hóben na e isla.
“Hubentut ta futuro i Jong Bonaire ta duna e futuro ei forma”, e ta agregá. Konsiensia tokante e influensia di UO Kleinmoedig ta enfatisá e importansia di e oumento di e konsiensia tokante e
influensia di UO bou di e abitantenan di Hulanda Karibense. “Mi ke duna splikashon den nan propio idioma, pa asina e informashon bira mas aksesibel.
Bentahanan
Ta importante pa hende komprondé kiko UO por nifiká pa nan”, e ta bisa. E ta ripará ku hopi habitante di e islanan no ta realisá ku nan tambe ta kontribuí na UO i ku nan tin derecho riba e bentahanan di esaki. “Ta manera bo ta miembro di un organisashon, bo ta paga kontribushon tur luna, pero ora tin un servisio sosial pa e miembronan, no ta permití bo di partisipá”, e ta splika.
Hopi bia ta lubidá e islanan Kleinmoedig ke pèrkurá pa bini mas atenshon pa e islanan i ku ta embolbí nan mas tantu den desishon oropeo. “Nos tambe ta oropeo i nos meresé e mes atenshon i bentahanan ku otro region”, e ta enfatisá. E ta mustra ku hopi bia tantu polítika hulandes komo oropeo ta lubidá e islanan. Nos mester pèrkurá pa envolví nos den e tumamentu di desishon”, e ta bisa.
Informashon pa vota
Habitante di Kòrsou i Aruba ku a registrá, por vota na Representashon di Hulanda. E abitantenan di islanan BES por vota na e sentronan elektoral lokal.
