Burney El Hage – potrèt: Jamila Baaziz
DEN HAAG – Burney El Hage ta haña e komoshon na Boneiru tokante su baimentu Hulanda komo konsehero di Bestuurscollege boneriano ‘dañino pa e isla’.
“Oposishon tin miedu ku nan ta sali pèrdí, pasobra tin e peliger ku mi aktuashon lo resultá positivo pa e bestuurscollege aktual.”
El Hage ta yama e komoshon ku a surgi rònt di su persona un ehèmpel típiko di ‘polítika munisipal’: “Otro aña tin elekshon. Riba un isla chikí manera Boneiru interes nashonal no ta lo mas importante tur ora. I aktualmente e diskushon ta retrasá: nan mester a drumi abou dilanti di e avion tempu ku mi tabata diputado pa evitá ku mi por a bini Hulanda. Aktualmente mi no ta den polítika mas. Ken ku ke por pidi mi konseho.”
Na e resepshon di siman di Hulanda Karibense (CN-week) na ministerio di Asuntunan Interior i Relashonnan den Reino ta manera niun hende no ta prekupa pa El Hage su presensia. Ta kana duna man tur rònt i despues ta sigui kombersashon animá. Kasi tur hende konosé i ta kumindá e bonerianu: di ámtenar haltu te minister Ronald Plasterk.
“Mi tin binti aña kaba ta bini Den Haag den tur sorto di funshon”, El Hage ta splika. Mi a saka potrèt ku varios promé minister, ku Lareina, ku Rei i Reina djawó, ku tur hende. Parlamentu hulandes tampoko nunka no a tene mi afó, ni sikiera den tempu ku e kaso den korte (Zambezi, red.) tabata kore ainda. Na Hulanda e hendenan a keda masha straño ku a poné mi den relashon ku korupshon. ‘Si Burney ta korupto anto ta tur hende mes por ta korupto’, mi tabata tende.”
‘No korupto’
El Hage ta mantené ku nunka e no tabata korupto: “Naturalmente mi no ta un angel tampoko ku a kai riba Boneiru for di shelu. Mi a hasi kos bon i kos ménos bon, pero korupshon sigur ku nò. Tur hende na Boneiru konosé mi i sa kiko m’a hasi i laga di hasi i pakiko mi ta para. Pero e kos di mas pió di kaso rònt di integridat ta ku ora únabes tin duda, e no ta kita nunka mas.”
Oposishon
Na Boneiru siman pasá oposishon a pidi gezaghebber Edison Rijna pa tene El Hage i Ramonsito Booi – ku ta na Hulanda pa motibu di un kongreso di Asosiashon di Munisipio Hulandes (VNG) – afó. E partidonan tabatin miedu di publisidat negativo pa Boneiru na Hulanda. Te awo esaki no tabata t’ei.
Motibu pa e miedu ta e rechaso resien di promé minister Mark Rutte pa topa ku delegashon parlamentario di Kòrsou, Aruba i Sint Maarten, pa motibu di e posibel presensia di e miembro di Staten di Sint Maarten Patrick Illidge. E ta bou di sospecho di korupshon den un kaso den korte ku ta kore ainda. Pero durante di e siman di CN no tin un enkuentro ku Rutte riba agenda.
Outor: Jamila Baaziz