Alumnonan di Saba Comprehensive School ke nan dosentenan bèk – potrèt: Alida Heilbron
THE BOTTOM – E úniko skol di enseñansa sekundario na Saba, nèt promé ku kuminsamentu di e aña di skol nobo ta hañ’é den problema serio: a retirá kuater dosente i e direktor. Dos otro dosente i e sekretaria ta solidario i nan mes a kita.
“E tim di maneho a rekomendá solamente retiru di ún dosente. Mi no tin un idea pakiko e otronan tambe mester a bai, nan ta bon dosente”, èks direktor Hemmie van Xanten ta bisa. E motibu ofishal pa su retiru ta ku direktiva ke “kue un otro rumbo”. E retirunan a kai na aprel. Na yüni numa a sali vakatura pa atrae personal nobo.
Stichting Leerplanontwikkeling (SLO), miembronan di konseho insular, mayornan, studiante i e coach di skol a pidi direktiva ku insistensha pa retirá nan desishon, pero sin resultado. Alumnonan di Saba Comprehensive School (SCS) a demonstrá kontra e desishon di direktiva di skol. Awor e direktiva ei ta pretendé ku e dosentenan a animá e demonstrashon. Dosente Terry Cunningham ta nenga esaki i ta bisa ku e alumnonan a hasi esaki di nan propio boluntat.
Hemmie van Xanten
Relashon
Kuminsamentu di aña 2012 diputado Chris Johnson, ministerio di Enseñansa, Kultura i Siensia (OCW) i Van Xanten a forma un task force pa pensa un masterplan pa mehorashon di enseñansa. Na ougùstùs di 2012 Van Xanten a bira direktor i el a forma un direktiva nobo di skol. “E relashon entre e direktiva i e tim di maneho no tabata fantástiko”, e ta bisa. E tabata sinti manera direktiva tabata limitá su ròl, espesial den desishon finansiero.
Den un karta na e diputado di Enseñansa mayornan a pidi pa revisá òf kambia statütnan di e direktiva di skol. Nan ke pa instalá un Konseho Konsultivo di Kogestion. OCW no ke riska esaki i den un reakshon a bisa ku e maneho di personal na e skolnan “ta algu di e direktiva i no di OCW”. E direktiva di skol mes no ke reakshoná riba e situashon aktual.
“Enseñansa den su totalidat ta kai bou di responsabilidat di konseho insular i tumamentu i kitamentu di personal ta kai bou di e direktiva di skol. Esei ta hopi kla pa mi i e partidonan envolví”, diputado Chris Johnson ta reakshoná.
Kontinuidat
OCW a pone seis mion dòler disponibel pa atraé i mantené dosente riba e islanan BES. Na aña 2016 tur skol na BES mester kumpli ku e kalidat básiko di Hulanda. “Mi tin gana di tende kon direktiva di skol por hustifiká di kita seis dosente i un direktor, mientras ku ministerio a reservá plaka pa mantené dosente i sigui traha riba kontinuidat”, mama di un di e alumnonan, Alida Heilbron, ta bisa.
“Mi tabata e di sinku dosente hulandes den tres aña”, dosente Elsbeth Verhoeven di e programa di MBO di e skol ta bisa. “Ta manera nan no sa kiko nan ta hasi. Kada be e alumnonan mester kustumá ku un hende nobo i ta dura kuater luna prome ku nan alkansa kaminda nan mester ta, esei ta masha lástima.”
Solidaridat
“Pa solidaridat ku mi koleganan m’a tuma mi retiro”, dosente Sarah Hertsens ta bisa. Ta masha tristu ku esaki por sosodé. Komo tim nos a krea un bon klima di skol, drecha klas, krea material pa duna lès ku ta kombiná e sistemanan hulandes i Caribbean Examinations Council (CXC). Nos meresé sosten pa sigui.”
Dosente di e programa di MBO Mark Dodds tambe ker a kita, pero el a disidí di keda tòg. “Si mi bai awor, e alumnonan ku na ougùstùs lo a bai nivel sinku, mester bai un otro isla pa sigui studia.”
Outor: Hazel Durand