CAPELLE AAN DE IJSSEL – Saka forsa for di bandera i kere den bo mes. Esei ta e mensahe ku Cynthia Ortega-Martijn tin riba dia di selebrashon hulandes di e di trinta Dia di Bandera di Kòrsou.
Ortega, di Overlegorgaan Caribische Nederlanders (Ocan) ta un di e papiadónan den un sala yen den Teatro Isala na Capelle aan den Ijssel. Na promé instansha tin hopi kantamentu di gospel na e enkuentro pero tin hopi atenshon pa Dia di Bandera tambe. Na Hulanda a selebrá e hubileo aki dia 6 di yüli na Capelle aan den Ijssel.
Bistí tur na bandera
Promé be ku a selebra Dia di Bandera tabata riba 2 di yüli 1984. Na Brionplein na Otrobanda, eksaktamente trinta aña pasá, a hisa bandera di Kòrsou pa promé be.
Kontadó di kuenta Wilbert Jaoen ta un di esnan presente. E ta bistí na kolónan di e bandera di Kòrsou. Hopi blou i un strea hel. “E dia aki ta masha importante pa mi. P’esei mi ta bistí tur na bandera i e ta den mi kabes i den mi pensamentunan tambe.” Ku orguyo for di kabes e ta deklamá un pensamentu tokante e dia aki ku nos mester ta orguyoso di nos bandera ku ta simbolisá solidaridat.
Guli bolita
Tin atenshon pa e banda mas skur tambe. Kos no ta bai bon pa hopi hóben. Nan ta sali for di Kòrsou mal prepará, un hóben ku e mes no tabata muchu bon mucha ta konta. Nan ta bai pa e plaka fásil; nan ta guli bolita i tira atrako.
Ortega den su spich tambe ta menta e bandanan mas skur. “Desempleo ta haltu i hopi ta hui den kriminalidat.” I e ta pone un relashon ku ‘e bandera’ tambe. E èks parlamentario di ChristenUnie ta yama Dia di Bandera e dia ku bo ta konmemorá bo identidat. “Kere den bo propio forsa. Bo propio talentonan i bo kalidatnan. Saka forsa for di e bandera ei.”
Reprogramá bo mes
“Nos mester reprogramá nos mes”, un hòmber hóben ku ántes tabata riba mal kaminda ta bisa. Kos malu ku bo a siña bo por kita bèk tambe, e sa di su propio ekperiensha. Un otro ta saka forsa for di su religion i no tin muchu kerementu den dia di bandera. “Mi a topa dios durante di mi kiebro” un hòmber di edat medio, ku djente di oro i renchi orea lombrante ta konta. Ora el a habri e kontenido di un brandkast ku el a hòrta a bin resultá ku e no tabata yen di plaka sino yen di karchi ku e teksto ‘Hesus stima bo’. For di e dia ei e no ta hòrta mas. “Mi a haña e rikesa di dios”, e ta bisa awor.
Kontadó di kuenta Jaoen ta kere den e multikolónan di su siudat Rotterdam. Hende di Kabo Bèrdè, turko, marokano, hindustano i naturalmente kurasoleño, e ta sigui deklamá. “Mi ta di Kòrsou i mi ta orguyoso di esaki!”
Outor: Sam Jones