Grupo di studiante Bonerianonku ta bai studia bou di guia
KRALENDIJK – Sint Maarten Student Support Services (S4) ta boga pa un periodo mas largu di guia di hóbennan ku a skohe pa bai kontinuá nan estudio na Hulanda. S4 ta guia studiantenan di Boneiru, St. Eustatius i Saba (Hulanda Karibense) ku ta studiando na Hulanda. Ta un organisashon sinembargo ku a lanta inisialmente pa guia studiantenan di St. Maarten, manera ta resaltá tambe den e nòmber.
Segun e palabrashonnan ku Ministerio di Enseñansa, Kultura i Siensia (OCW), e guia ku S4 ta duna e hóbennan studiante di islanan di Hulanda Karibense ta pa solamente 1 aña. E presidente di direktiva di S4, Rinaldo Hassell, ta mira e periodo kòrtiku aki komo un limitashon.
Dia 3 di ougùstùs 10 bekado di Boneiru ta sali pa Hulanda. Di e isla St. Eustatius tin 5 i di Saba 2 hóben ku ta bai sigui studia na Hulanda. Nan ta bai bou di guia di S4. E bekadonan di Boneiru i nan mayornan djaweps último a haña informashon serka S4 i e sekshon di Finansiamentu di Estudio di Hulanda Karibense tokante e biahe, guia i akomodashon na Hulanda.
Informashon
Rinaldo Hassell, huntu ku e mènedjer di S4 Roos Leerdam-Bulo, siman pasá a pasa tur e tres islanan di BES òf Hulanda Karibense pa duna informashon na e bekadonan. Tambe nan a duna tayer i a suministrá informashon na studiantenan di St. Maarten ku ta bai Hulanda pa kontinuashon di nan estudio, ku ta kai bou di nan guia. E studiantenan di St. Maarten ta haña guia intensivo di S4 durante e promé dos aña ku nan ta na Hulanda. Despues di e dos aña aki S4 ta sigui mantené kontakto ku e studiantenan di St. Maarten.
Rinaldo Hassell ta deseá si por ekstendé e guia ku ta duna e studiantenan di BES tambe pa dos aña, meskos ku ta konta pa esnan di St. Maarten. El a splika: “Den e promé aña e kos ta kuminsá bira mas impaktante. Nos ta konsehá un guia pa henter nan karera komo studiante komo studiante, spesialmente den e promé dos añanan”.
Responsabilidat
S4 ta sigui den kombersashon ku OCW pa mira si por ekstendé e periodo di guia pa studiantenan di BES. Hassell ta indiká ku e studiantenan despues di e promé aña ei ainda por akudí serka S4. “Nos no ta nenga di atendé nan. Nos ta tuma e responsabilidat ei i ta sigui den konsulta ku OCW”.
No solamente 10 studiante di Boneiru ta sali pa Hulanda. Na total a drenta 150 petishon pa finansiamentu di estudio. No ta konsedé nan tur, segun Jefferson Coffie funshonario di e sekshon di Finansiamentu di Estudio Hulanda Karibense. No tin ainda sifra konkreto di e kantidat total di studiante ku ta bai sigui studia na Hulanda, segun Coffie. Tin un parti grandi ainda di studiante ku mester hasi algun tèst promé ku nan bai sigui studia.
Tin un grupo grandi di studiante ku ta bai Hulanda sin guia. Ta denominá e grupo aki komo ‘free movers’. Nan tin famia i konosínan bibá na Hulanda ku ta sigui yuda nan. E studiantenan aki a partisipá sí na e preparashon ku tabatin pa e studiantenan di BES. Nan a haña entre otro un kurso di orientashon i un kurso di propio sobrebibensia na Hulanda.
Outor Belkis Osepa