Es ku entregá un arma ilegal ta haña 100 florin
WILLEMSTAD – Den e lucha kontra kriminalidat lo bini un liña di telefon pa hasi denunsio anónimamente, por entregá arma ilegal sin persekushon i lo introdusí ‘road block’ i ‘check point’ pa listramentu preventivo.
E tim di atrako di polis lo haña asistensia èkstra di 10 polis. Tur esaki ta parti di un pakete di medida ku minister di Hustisia Nelson Navarro a anunsiá siman pasá den un diskurso nashonal. Ministerio Publiko (OM) – i no polis manera kustumber – lo manehá e liña di telefon kaminda anónimamente por denunsiá òf entregá arma.
Anónimo
Navarro ta bisa ku e idea ta eksistí ku pueblo no ta konfia polis i tin miedu ku lo pasa informashon. “Mi no ta komentá si e miedu aki tin su motibu, pero ta p’esei nos a skohe pa OM manehá e liña, kaminda anonimidat ta garantisá.”
Shen florin pa arma
Te dia 31 di ougùstùs tur hende ta haña e oportunidat pa entregá su arma di kandela ilegal na De Tempel, e edifisio di OM na Wilhelminaplein. Esaki ta posibel entre shet’or di meinta te seis or di atardi, pero por yama 0800-TA BASTA tambe pa evitá ku hende ta kana yega na OM ku arma di kandela den man. “Nos ta duna shen florin pa kada arma di kandela”, fiskal mayó Heiko de Jongh ta laga sa. Es ku duna un tep anónimo unda tin un arma ilegal por kobra un rekompensa si di bèrdè haña e arma, ta dependé di e tipo di arma ku haña.
Intimidashon
Si entrante promé di sèptember haña un hende ku un arma ilegal e por konta ku un ‘persekushon penal fuerte’, segun OM. Durante e konferensha di prensa Navarro a laga sa enfátikamente ku lo no tolerá intimidashon di polis ku ta listra preventivamente. Den último binti aña konfiansa den – i rèspèt pa polis a bai pèrdí. “Pero mi ta bon kla: Si bo haña instrukshon bo ta koperá. Si bo kere ku bo por tira riba polis, polis lo bin bèk pa bo hopi duru.”
Outor: Anneke Polak