Iftar durante ramadan foto Belkis Osepa
KRALENDIJK – Sinku Boneriano mòslim i nan famia ta forma parti di e komunidat mòslim na Boneiru. Bonerianonan ta kurioso pa sa di e religion islam. Tin pregunta ora un Boneriano kombertí i bira mòslim. “Komo Boneriano mòslem ora bo papia ku famia tokante islam, nan wowo ta habri i nan tende loke nan no tabata sa”, segun Masoud Libiee.
Kasi shet’or riba un anochi komun den siman durante ramadan, algun hende hòmber ta drenta e moské Bonaire Islamic Center. Denter di poko lo kuminsá iftar, ora ku mòslem ta kibra ku e yuna durante ramadan. Despues di resamentu bou di guia di imam El Houssein Essabir, tur mòslim ta sinta na mesa huntu pa kuminsá ku iftar.
Reportahe tokante Boneriano mòslem
Aseptashon
Mas o ménos shen famia na Boneiru ta mòslem. Tambe e Bonerianonan Masoud Libiee i Muhammad Amin Nicolaas. Despues di resamentu nan tambe ta djòin na mesa. Libiee ta mas ku binti aña mòslem. El a kustumbrá ku ramadan. Libiee no ta haña ku ta difísil pa ta un mòslem lokal. “E aseptashon no tabata difísil. Ora mi ta papia tokante religion ku famia ku no ta islámiko, nan wowo ta habri i nan ta tende loke nan no tabata sa. Hopi bia ta ora un hende no sa algu, e no por reakshoná i papia tokante di dje.”
Kontrali na e temporada largu ku Libiee ta mòslim, Muhammad Amin Nicolaas ta solamente dos aña i mei mòslim. Nicolaas ta bisa ku el a tende reakshonnan bastante chistoso ora el a kombertí na e religion di islam. “Tin a bisa ku mi a bira mòslem pasobra mi por kasa ku mas muhé òf pasobra mi ta terorista. Pero poko poko nan a kuminsá komprondé I ke sa mas di e religion islam.” Nicolaas tambe ta haña ku komo yu di tera, otro Boneirano ta aserk’é mas lihé pa papia tokante islam. “Tòg nan ta habrí pa e religion.”
Outor Belkis Osepa