Fiskal Gert Rip
WILLEMSTAD – Ministerio Públiko (OM) no a duna masha balor na e retiru di e deklarashonan di Elvis “Monster”Kuwas. “Awor e ta un sospechoso ku ta ninga, esei ta hasi tur kos mas pió ainda p’e.” Asina fiskal Gert Rip a argumentá awe durante e di dos dia di e kaso Magnus. Monster ta e sospechoso prinsipal den e kaso di e asesinato di lider di Pueblo Soberano Helmin Wiels; e lo ta esun ku a tira e tirunan ku a mata Wiels.
OM ta eksihí kastigu di bida largu pa Monster .“OM no por skohe otro, mirando e pasado kriminal i e aktitut durante e proseso di Monster.” Ademas OM ke ‘kita’ e plaka ku el a gana ku e tres asesinatonan, entre nan esun riba Wiels – i e atrako riba Hendrik Henriquez. Rip tabata parse di no tin interes den e alegashonnan di Monster su abogado Olga Saleh-Kostrzewski ku e prueba kontra su kliente ta solamente basá riba deklarashon inkonsistente di testigu i soborno.
Segun Rip apsolutamente no tin un dil entre Monster i OM pa haña un deklarashon, manera Saleh ta bisa. “Loke ami i Monster a papia durante e interogashon riba 14 di novèmber no tabata un dil. E palabrashon ku OM a hasi ta ku Monster por sinta su detenshon na Hulanda, no komo rekompensa pa un deklarashon sino pa su propio seguridat. Hurídikamente ta pèrmití pa hasi palabrashon ku sospechoso i testigu i den e kaso aki asta tabata nesesario”, segun Rip.
Mientras ku abogado Saleh-Kostrzewski a tene un diskurso ekstenso tokante e diskrepansianan den e investigashon di OM, e defensa di e fiskal ku a bira poko iritá tabata kòrtiku i desididu: “aparentemente e abogado den tur kos ta mira un dil. Pa ehersé preshon serka e tiponan di echo kastigabel aki ta nòrmal i permití.”
Asesino pa plaka
“Un bida humano tin hopi balor, pero aparentemente no pa e sospechoso”, Rip a argumentá. Na momento ku e fiskal a konkluí su rekisitorio e famianan di e defuntu den sala a reakshoná emoshoná. “E sospechoso a kometé tres asesinato puramente pa e plaka i el a hasi esaki manera un asesino profeshonal. Su akshonnan a kousa masha hopi doló serka e famianan i e sernan kerí. Nan tin difikultat èkstra pasobra nan tin hopi pregunta ku e sospechoso no ke kontestá.”
OM ta keda mantené e deklarashonnan ku Kuwas a retirá, di su kasá Monalisa i di su baisaitnan i di su ko-sospechosonan. Segun Rip e deklarashonnan aki ta sostené e investigashon tékniko i táktiko i otro deklarashonnan di testigu.
Opshonnan
“Nunka nos no a meskiñá un proseso honesto resueltamente. E abogado ta bisa ku e lo sigui lucha te na último pa laga deklará OM no reseptivo. E ta bisa ku esaki ta e úniko opshon. Un mihó opshon ta pa e sospechoso deklará normalmente segun bèrdat. Esaki lo ta bon pa e mes pero pa e famianan tambe”, Rip a finalisá.
Outor Leoni Leidel-Schenk