Gwendolyn van Putten School – potrèt: The Daily Herald
ORANJESTAD – Na promé instansha tur kos ta mustra normal na Gwendoline van Putten (GVP) School, e úniko skol pa enseñansa sekundario na Sint Eustatius. Lèter ku a pinta riba e muraya dilanti ta enkorasha e alumnonan pa ta inspirá, pa presta, soña i perseverá i pa tin rèspèt.
Pero paden, segun inspekshon di enseñansa ta henteramente otro kos. “Prekupante i vulnerabel”, asina inspekshon ta yama e kalidat di enseñansa na e skol aki.
Inspekshon fin di aña pasá a publiká un investigashon tokante kalidat na skol GVP, ku ta ofresé enseñansa na nivel di havo i VMBO i enseñansa di práktika. For di òktober 2010 enseñansa ta un di e puntonan klave di maneho hulandes. For di 2012 tur aña inspekshon ta evaluá kalidat di enseñansa na Boneiru, Statia i Saba. Na 2016 GVP tambe mester kumpli ku tur aspekto di kalidat básíko.
Ambiente perturbá
Aktualmente e skol no ta kumpli ku kalidat básiko ainda. Inspekshon a bin topa ku un ambiente perturbá na skol. “Riba tur nivel den e organisashon di skol tin hopi malkontentu i ta papia mas riba otro ku ta komuniká ku otro”, asina por lesa den e rapòrt. Den tur gremio ta deskribí ku e ambiente na skol no ta seif i tin tiki konfiansa mutuo entre personal i direktiva. “Tin dosente ku no ke duna nan opinion mas pasobra nan tin miedu di reperkushon”, segun inspekshon.
E alumnonan tambe ta ripará e ambiente negativo aki. Tabatin diferente konflikto entre alumno i entre alumno ku dosente. Mayornan tin tiki konfiansa ainda den e skol.
Keda sinta
Ademas di e ambiente dañá e resultadonan tambe ta bai atras. E porsentahe di alumno ku ta keda sinta espesialmente den VMBO ta masha haltu. E resultadonan di èksamen final tambe ta desapuntá i e èksamennan no tin sufisiente nivel.
Inspekshon ta bisa ku ta espesialmente e lèsnan di VMBO ta hopi bou di nivel. No por a realisá e tempu pa duna lès ku a planea pa último aña, pasobra un gran kantidat di ora a kai afó pasobra ta hopi dosente tabata kita i no tabata yena e oranan na tempu.
E skol ta rekonosé e problemanan i ta bisa ku un parti ta kousá pa e echo ku mayoria di e alumnonan no ta dominá idioma hulandes sufisientemente. Tambe GVP ta hañ’é konfrontá ku hopi alumno di skol básiko ku ta atras den trahamentu di sòm i idioma hulandes.
Mal kos
Direktiva ta bisa ku nan ta realisá ku e inkietut den skol ta mal kos, espesialmente pa e muchanan di Statia. “Nan ta meresé ku tur hende ta keda hasi 100 porshento nan mihó esfuerso pa nan.” Direktiva ta bisa ku e dosentenan meresé kòmplimènt pa e manera ku nan ta sigui buska moda pa hasi nan alumnonan mas ábil.
Prekupashon
Politika tambe ta prekupá. “Enseñansa sekundario no ta bon. E hendenan riba e isla ta papia ingles. Na skol básiko tambe ta duna lès na ingles. Pero den enseñansa sekundario di repente nan mester kambia pa enseñansa na hulandes”, e parlamentario di PvdA Roelof van Laar ta skibi riba website di su partido.
Komo bosero di PvdA pa relashonnan den reino el a bishitá Sint Eustatius mas den kuminsamentu di e luna aki. Van Laar ta bisa ku pronto lo tin deliberashon por eskrito tokante enseñansa na islanan BES. “Pa mi parti señal prekupante for di Sint Eustatius lo hunga un ròl grandi den e deliberashon aki.”
Outor: John van Kerkhof