Justin i Jaylen ta traha nan hùiswerk atrobe – potrèt: Dick Drayer
WILLEMSTAD – Muchanan di Dr. Nelly Winkelschool, un skol pa enseñansa speshal, no tin seguridat kontra e beisnan i kaprichonan di nan yefrou. Asina Petra Meijer ta bisa. E tabatin dos yu hòmber di nuebe aña na e skol, Justin i Jaylen.
Nan mester a sufri humiliashon i regularmente tabata zundra nan yama nan idiota. Aña pasá kaba Meijer a trata di pone Justin i Jaylen na un otro skol. Esei no a logra. E aña aki nan a haña lugá na Kennedyschool.
Otro mayor tambe ta bisa ku tin kos straño ta pasa na Nelly Winkelschool. Solange Brigitha a kita su yu hòmber Dyangelo (9) for di e skol. “No tabata por mas, tin be tabata manda Dyangelo ku bala di tènis den su kabes. Semper tabata tin masha gritamentu kontra di e muchanan, tin be varios minüt largu.” Segun Brigitha e personal di enseñansa apsolutamente no por hèndel e enseñansa di LOM. “No ta grita so, nan ta dal e muchanan tambe”, e ta bisa.
Petra a graba e gritamentu i zundramentu i a konfrontá Soraida Mardenborough, e kabes di skol, ku e grabashonnan. Esaki a rekonosé e aktitut problemátiko di sierto dosente. El a konta ku e komportashon aki tin e prekupá i el a pidi despensa, e yefrou mes asta a haña un aviso. Pero e gritamentu i zundramentu no a para. Ora Petra ker a bolbe entregá un keho a bis’é ku e skol no por hasi nada mas pasobra e yefrou tin trabou fiho.
Ademas e kabes di skol no ta haña ku tin nada malu ta sosodé na su skol: “Mi skol ta meskos ku kalke otro skol.” Sa tin dosente ta haña atake di lokura pero segun e esei ta sosodé na tur skol.
Dienst Openbare Scholen
No tabata posibel pa palabrá e problema serka Dienst Openbare Scholen (DOS, Servisio di Skolnan Públiko) bou di kua Nelly Winkelschool ta kai. Durante e kombersashon ta bin sali ku e hefe suplente di DOS, Aldrick Crique, no a lesa e fail.
Petra Meijer: “E no tabata sa nada di e insidentenan i a ninga di papia tokante loke a pasa. E ker a buska solamente solushon kaminda lo spar e trahadónan i el a akusá ami ku mi ker a kita e yefrou.”
Ora Petra Meijer a disidí di tene su yunan na kas si DOS a tuma akshon i a manda un funshonario di enseñansa. Esaki a bini ku un solushon: lo a kambia e muchanan pa un otro klas ku guia èkstra. Pa Meijer e kos a keda manera ta ku e medida aki ta kastigá su yunan i no tabata tin nodi di koregí e yefrou.
Dosentenan
Dosente ku a traha na e skol ta konfirmá e relato di Petra i e otro mayornan. “Ta yen di kos no ta kuadra na e skol ei”, Rixt de Vries, ku na 2011 a kuminsá duna lès na Nelly Winkelschool, ta bisa. “Kontinuamente e dosentenan ta usa nan telefon selular, den lès, den reunion, ora nan kana warda riba plenchi di skol. Nunka nan no ta paga tinu na e muchanan.
“Durante di lès hopi di mi koleganan tabata lesa korant, òf ki ora ku bo ke nan tabata kana sali for di klas i laga e muchanan nan so òf ku un stazjèr. Mi ta haña esaki iresponsabel na un ‘skol speshal’, ku mucha difísil ku mester di hopi atenshon i struktura. Bo por a ripará na tur kos ku e dosentenan no tabata okupá nan mes ku enseñansa i e muchanan”, De Vries ta bisa.
Espesialmente e gritamentu i e uso di violensia verbal i físiko kontra e muchanan segun De Vries tabata horibel. “E kabes di skol ta skonde den su ofisina. E no tin bista riba kiko ta pasando paden i pafó di klas. “ DeVries na un dado momentu no tabata por mas i el a tuma su retiru.
Reakshon
Aldrick Cirque no ke komentá riba loke Petra Meijer, otro mayornan i e èks dosentenan ta bisa. Segun e kasi nunka no sa pasa ku un funshonario di enseñansa di e skol mester bai hèndel un problema. “Esei ta indiká ku e skol ta masha kompetente den tratamentu di desena di kaso problemátiko pa dia”, e ta bisa. Pero Cirque ta atmití ku su dosentenan ‘sa kometé eror de bes en kuando’.
Outor: Dick Drayer