Protesta kontra e státùs aktual – potrèt: The Daily Herald/Althea Merkman
ORANJESTAD – Brighter Path Foundation ke rekurí na e komishon di dekolonisashon di Nashonnan Uní. E fundashon ta un di e forsanan tras di e ambishon pa tene un referèndem tokante futuro estatal di Sint Eustatius.
Diputadonan i Eilandsraad ta para tras di un referèndem, ku lo tene na novèmber. Pero ainda no a establesé un fecha ni tampoko ki pregunta lo hasi e votadó. Asina tampoko no sa si pueblo di Statia lo por duna un opinion tokante independensha.
Ta sigur sí ku e referèndem, ku ta sigui e evaluashon di e státùs konstitushonal aktual di Boneiru, Statia i Saba na 2015, lo tin solamente un índolé konsultativo.
Malkontentu
Brighter Path ta haña importante ku stasiano por duna nan opinion tokante státùs di e isla, pasobra esaki ta trese hopi malkontentu. Espesialmente sosial-ekonómikamente e státùs di munisipio ekstraordinario ta kousa hopi problema, ku preisnan ku ta subi i preshon di impuesto ku ta oumentá. Brighter Path ke pa tene kuenta ku opinion di stasianonan den e evaluashon, pasobra ainda nunka e no por a duna su opinion tokante e státùs aktual.
Den e referèndem ku a tene dia 8 di aprel 2008 na Statia, ku 83 porshento di e votonan a skohe pa mantené Antia Hulandes. Pasobra e otro islanan ker a bandoná Antia Hulandes komo unidat estatal, gobièrnu insular na final a skohe pa laso direkto ku Hulanda. Hopi stasiano ta di opinion ku e státùs ta fòrsá i ku el a kousa hopi problema.
“Ta importante pa Nashonnan Uní ta na altura di e situashon spesífiko ku Statia t’aden i ku for di awor lo envolvié den e proseso”, Brighter Path ta laga sa.
Outor John van Kerkhof