Di robes pa drechi William Marlin (NA), Sarah Wescot-Williams (DP), Frans Richardson (Ysp), Silveria Jacobs (NA) i Cormelius de Weever (DP) – potrèt: DP / Michael Ferrier
PHILIPSBURG – E partido UP di Theo Heyliger a gana elekshonnan pa parlamento djabièrnè, pero tòg e partido a keda man bashí. E shete asientonan ku e partido bèrdè a haña nèt no tabata sufisiente pa un mayoria apsoluto di diessinku asiento.
E otro tres ganadónan di asiento – Nationale Alliantie (kuater), Democratische Partij (dos) i Verenigd Sint Maarten (dos) – den oranan di meinta a sera un akuerdo pa forma un gobièrnu nobo.
No manera ta kustumber na Hulanda, kaminda e ganadó di elekshon ta haña e promé opshon pa forma un gobièrnu, na Sint Maarten e negoshashonnan entre partnernan interesá ta kuminsá kompletamente arbitrario.
Integridat
UP tabata envolví den froude di vota na 2010. Pero ta algun polis i un representante di e partido so a parse dilanti wes. OM no a investigá UP i su lider di partido Heyliger, motibo pa korte deklará OM no reseptivo.
Evashon di belásten
Riba e lista di UP tabatin Maria Buncamper-Molanus ku ta sospechoso di labamentu di plaka i Silvio Matser, ku na desèmber mester a bini dilanti wes pa evashon di belásten pa un suma di 3.2 mion dòler. Matser tabata den bòm di lista di UP pero el a kue asina tantu voto personal ku e lo bira miembro di e parlamento nobo.
Remarkabel
No a konta tur voto ainda djasabra meinta i no ta kla ta kua karanan lo bai forma e parlamento nobo. Ta remarkabel ku Silveria Jacobs, e minister di Enseñansa den e promé gabinete Wescot-Williams, a kue mas voto ku lider di su partido William Marlin.
Outor: Hilbert Haar