Claire Romein – potrèt: Jamila Baaziz
HILVERSUM – “Prepará bo masha bon promé ku bo pensa di bini Hulanda.” Esei ta e konseho di dosente i coach Claire Romijn na hóben karibense ku ta soña di un mihó futuro na Hulanda.
Sòru pa bo por inskribí un be, pa asina bo tin un burgerservicenummer mesora. Regla un seguro médiko i kuminsá pidi finansamentu di estudio. I mehorá bo hulandes. Bo mester por lesa i skibi e idioma bon.”
E relato di Raylison Eisden (un kontribushon di John Samson)
Romijn sa mihó ku tur ki problema freemover ta haña nan aden si nan riska bula pa Hulanda. Dia e mes a bini Hulanda ku su famia el a sigui training di solisitashon i un kurso di computer. “Ounke ku mi tabatin un edukashon di HBO m’a ripará ku na Hulanda kos ta bai otro for di na Kòrsou. Semper bo mester ta dispuesto di siña i kue bo chèns pa ta eksitoso.”
Na su trabou na un ROC na Rotterdam e ta mira ku hóbennan hopi be no sa kiko ta nan derechinan i nan debernan i asina ta kuminsá ku un retraso. “Nan famia no a konta nan berdat tokante e bida aki. E bida ta espesialmente difísil pa hóben ku poko perspektiva ku ta lanta den sirkunstansha sosial difísil. Hopi be nan ta bini for di famia kibrá i tin be nan no a siña bon komportashon.”
Raylison Eisden – potrèt: John Samson
Sin nada
Ku famia i amigu no ta konta semper kon e bida na Hulanda ta di bèrdè mes ta un kos ku Raylison Eisden di Kòrsou tambe a ripará. Shete aña pasá el a bini Hulanda ku speransa riba trabou. Pero praktika a desapuntá: Un tempu mi tabata sin nada. Sin kas, sin plaka, sin trabou. Ma yega fondo ora mi mester a sali for di kas di un amiga. Mi tabata riba kaya ku tur mi kosnan ta warda tram. Mi tabata yama tur hende na telefon: ‘Ki mi tin ku hasi? Mi ta riba kaya. Mi ke bai Kòrsou bèk’.”
Eisden ta haña ku gobièrnu di Kòrsou mester duna mihó informashon i mester pèrkurá pa hoben por tin un bon bida na Kòrsou tambe. “Na Hulanda tur hende tin un pas di banko. Mi ta haña ku gobièrnu mester duna hóbennan un entrada básiko di 600/700 florin. Pa asina nan por sobreviví. E ora ei bo ta pensa bon promé ku bo bai hasi kos robes.” E tin e idea pa via YouTube bai informá hóbennan tokante di e bida na Hulanda. E ta yama su plan ‘Di Kaya Pa Komunidat’ i un di e dianan aki e ta kuminsá.
Solushon
E solushon pa e problema di e freemovernan segun tur eksperto ku ekperiensha pa un gran parti ta riba e islanan mes. E difikultat ta ku ta difísil pa aserká e grupo, ku no ta eksistí sifra tokante di esaki i ku e hóbennan no ta organisá, manera e bùrsalnan si ta. Pa nan tin kantidat di akohida i sosten na Hulanda.
Segun Marilyn Alcalá-Wallé, ku den su propio fundashon ta trata di yuda studiante karibense ku nan problemanan di paga nan debenan i ku informashon, e akohida di freemovers na Hulanda tambe ta masha importante. Pero e tambe ta konfirmá ku den práktika esaki ta kompliká. “Na Kòrsou tin tiki aktividat struktural, pero por yuda si e hóbennan por inskribi na Hulanda mas fasil. E ora ei e chèns ku nan ta kai atras ku estudio i pago ta mas chikí.”
Plaka pa e grupo aki
Na Hulanda kon ku bai bin guia di freemover i antiano for di fin di 2013 a bira mas difísil, Romijn sa di su propio eksperiensha. Komo presidente di Strategisch Antilliaans Arubaans Beraad (SAAB) den su siudat Capelle a/d Ijssel su papel komo interlokutor pa munisipio a kaduká. Antianonan ku problema mester akudí na instanshanan regular. Den práktika esaki no ta funshoná tur ora pasobra tin be ta falta e konfiansa. “I hendenan no sa unda nan por akudí pa ayudo”, segun Romijn.
Ta p’esei pa sobreviví tòg komo freemover i edifiká un bida bon nan mester keda buska i lucha, Eisden ta bisa. Entretantu el a hana trabou komo kuedó di shushi na Rotterdam, e tin un kamber i e ta purba di kuida su dos yunan bon. Su sekreto: “Bida ta manera guera. Bo mester trata bo problemanan kaminda nan a kuminsá i no keda drumi. Bo no mester pensa ku otro hende lo regla nada pa bo. Bo mester lanta tur dia i reakshoná riba vakatura i bai uitzendbureau.”
Outor Jamila Baaziz