Eligio Thielman dilanti e plenchi na Playa
KRALENDIJK – E fecha di 10-10-’10 a horka nos”, asina un penshonado indigná a bisa tresten e ta sinta riba un banki riba e plenchi Susanita Trinidad na entrada di un banko lokal na Playa. Ei penshonadonan ta reuní regular. No solamente einan, pero tur kaminda na Boneiru e krítika riba kuater aña despues di 10-10-’10 ta bai den e direkshon aki: E desigualdat sosial ekonómiko ta e desgusto di mas grandi serka Bonerianonan.
Tin dje penshonadonan ta bende brièchi riba e plenchi, otro ta einan diariamente djis pa ta aktivo soshalmente. E penshonado indigná no kier a bisa masha mas. Un solo kos el a keda ripití: ‘Ta e fecha ku a horka nos.’ Un otro penshonado ta bisa ku e fecha ta un tragedia p’é. “Sèn no ta yega mes. Pesei nos ke nos Boneiru bèk.”
Diferensha
E reklamonan i kehamentu ta mustra ku e malkonentu pa e desigualdat tei. Na Boneiru ta wak e diferenshanan grandi entre Hulanda Karibense I Hulanda Oropeo pa loke ta trata sueldo mínimo, e mínimo ku mester tin na entrada pa por sobrevisí, penshun abou, falta dip ago pa yu, ònderstant abou I otro sobra entradanan soshal ku ta diferensha ku Hulanda Oropeo.
Penshonado Eligio Thielman ta biba na Spaña pero ta bin regular Boneiru, su isla natal. E tambe tabata na e plenchi kombersando ku e damanan penshonado. E tambe ta pesimista meskos ku e otronan. “Nos ta bai atras. Mi ke mi Boneiru di antes bèk. Boneiru no ta di makamba.”
Gañadó
Thielman ta kuestioná e primintimentu ku Boneiru lo haña tur kos manera Hulanda. “No tabata bèrdat. Nan ta gañadó.”Referèndem lo tabata un solushon, pero no tin union na e isla.
Tantu presentadó di radio Nòchi Willem, komo abogado Michiel Bijkerk ku ta alabes lider di e partido PHU, ta enfatisá ku igualdat mester bini. Willem: “A primintí e Bonerianonan igualdat din an derehconan social ekonomiko si nan bai di akuerdo ku e státùs aktual. Pero tòg e pueblo ta sinti ku el a keda atras i nan kalidat di bida a bai atras.”
Bijkerk ta brigando ainda e kaso pa igualdat di penshun di behes. Pronto ta tuma lugá e apelashon despues ku el a pèrdè e kaso. Ïgualdat i libertat ta pilanan fundamental di nos demokrasia. “Nos a bira un parti integral di Hulanda. I e derechonan sosial ekonómiko I derechonan humano tambe ta konta pa nos.”
Outor Belkis Osepa