Protesta stasiano kontra struktura estatal aktual di e isla – potrèt: The Daily Herald
ORANJESTAD – Kuater aña despues ku Sint Eustatius a haña státùs di kuerpo públiko stasianonan por duna nan opinion tokante e státùs estatal di nan isla. Eilandsraad djárason a disidí di tene un referèndem konsultativo ku mester tene pa mas tardá dia 31 di desèmber.
Gobièrnu hulandes ta dispuesto di evaluá e státùs di Boneiru, Statia i Saba na 2015, pero pa hopi stasiano esaki ta muchu poko i muchu lat. Miembro di konseho di SLAM Millicent Lijfrock ta un simpatisadó indiskutibel di un referèndem. “E referèndem mester bini. Ta afektá e derechonan, dignidat i integridat fundamental di stasianonan, sin paga tinu kon e hendenan ta sinti nan mes.”
E konseho a vota ku kuater voto pro i un kontra pa tene un referèndem. United People’s Coalition (UPC), Statia Liberal Action Movement (SLAM) i e miembro di eilandsraad independiente Reuben Merkman a entregá e moshon. E moshon a haña sosten tambe di St. Eustatius Empowerment Party (STEP). Ta Democratische Partij (DP) so a vota kontra.
Outodeterminashon
E derecho riba outodeterminashon i e echo ku nunka pueblo di Statia no por a duna nan opinion tokante e státùs aktual tabata e motibunan prinsipal ku a duna pa tene un referèndem. Ainda no ta konosí kua preguntanan lo proponé na e votadó òf si independensha total tambe ta un di e opshonnan. Ta posibel tambe ku e votadónan lo por vota solamente ku un “si” òf “nò” tokante e státùs aktual. Eilandsraad a duna un komishon di tres miembro independiente òrden pa bini ku un proposishon promé ku 22 di òktober.
Malkontentu
Den sírkulonan polítiko masha dia tabata sklama pa un referèndem. For di tempu di desmantelashon di Antia hulandes tin hopi malkontentu tokante e lasonan mas estrecho ku Hulanda. Espesialmente e preisnan mas haltu pa produkto den pakusnan i tiendanan, e preshon di belasten ku ta subi i e influensha di polítiko i amtenar hulandes ku e hendenan na Statia ta eksperienshá komo metementu riba e isla, ta ser konsiderá komo e opstákulonan di mas grandi.
Sklabitut moderno
Segun Lijfrock e situashon aktual riba e isla no ta hopi diferente for di sklabitut moderno. “A bira tempu pa lanta para i bringa ku kada fibra den nos kurpa. Esaki ta e tempu pa liberashon i emansipashon. Poder ta den man di pueblo.”
Partido di oposishon DP a deklará su mes simpatisadó di e státùs aktual di kuerpo públiko, pero DP tambe ta haña ku por mehorá un ke otro den e relashon entre Hulanda i e islanan. Segun e partido den e státùs aktual por gana algu ainda na outonomia. Pasobra e isla por disidí pa tuma ofer sierto tarea i responsabiilidat di gobièrnu hulandes, por ehèmpel den área di enseñansa i kuido médiko. E otro partidonan ta bai pa mas distansha entre nan i Hulanda ounke tin basta diferensha di opinion tokante ‘kuantu’ i ‘kon’.
Mobilisá
Organisashonan sosial Pro Statia i Brighter Path Foundation tin lunanan largu kaba ta hiba akshon pa tene un referèndem. Ku anochinan di informashon i akshonnan di firma nan ta trata di mobilisá pueblo. “Tur dia nos ta tende keho. Kuater aña ta sufisiente pa mira ku kosnan no ta bayendo bon i ku mester drecha nan, i ta trata di masha hopi asuntu”, bosero di Pro Statia Glenn Schmidt ta bisa.
E èks diputado di finansa tin tiki konfiansa den e evaluashon di otro aña. “Esei ta solamente pa solushoná difikultatnan burokrátiko”, Schmidt ta bisa. “Kisas e por trese miho sosten finansiero sosial i mas invershon, pero e evaluashon lo no laga e deseo di mas grandi di nos hendenan, esta ku nan ke manda den nan mes kas i tuma nan mes desishonnan, sali.”
Outor: John van Kerkhof