Minister Plasterk mésora despues di Konseho di minister di Reino – potrèt: Jamila Baaziz
DEN HAAG – Gobièrnu di Sint Maarten por lo pronto no por kuminsá goberná. Gobernador di Sint Maarten ta obligá pa promé investigá e integridat di e gabinete nobo di Sint Maarten promé ku e bai di akuerdo ku nan nombramentu. Asina Konseho di Minister di Reino a disidí awe pa medio di un instrukshon ku nan a duna e pais.
Den e asuntu aki gobernador Eugene Holiday mester usa eksperto for di Hulanda, ku minister Ronald Plasterk di Relashonnan den Reino lo selektá p’é. Esaki ta nifiká un screening pisá pa e ministernan.
E instrukshon aki ta e di dos pa Sint Maarten den tiki tempu i ta un kontinuashon di e promé instrukshon. E promé be a fòrsa Holiday di laga investigá e integridat di gobièrnu di e pais independientemente. E resultado di e investigashon tabata ku nepotismo i konflikto di interes ta un problema grandi den e pais i ku polítikonanan ta opstruí amtenarnan. P’esei Plasterk ta bisa ku awor e no tin otro eskoho: “Ta krusial pa establesé e integridat di e hendenan ku nombra.”
Heyliger
Plasterk ta nenga ku a duna e instrukshon pa evitá ku e kontroversal Theo Heyliger bira promé minister di Sint Maarten. “Mester tin siguridat tokante integridat di tur mandatario.” Plasterk ta bisa tambe ku e screening ta bai mas leu ku solamente mira si e personanan a kometé echo kastigabel: “Mester tin garantia ku despues di nombramentu tampoko no por surgi problema.”
Propio solushon
Segun Plasterk no tabata un opshon pa laga Sint Maarten mes keda enkargá ku e screening di e ministernan na e manera ku Hulanda ke. “Mi tabatin kontakto tokante esaki ku promé minister demishonario Sarah Wescot-Williams. Pero e no a mira posibilidat pa hasi algu komparabel. Lo mi a preferá si Sint Maarten mes tabata por a hasié, pero mi a avis’é ku konseho di minister di reino lo a disidí esaki.
Outor: Jamila Baaziz