Foto: Ariën Rasmijn
ORANJESTAD — Comision Accion Nacional (CAN), e organisacion cu a organisa e manifestacion di 1 di oktober ultimo, tin intencion pa organisa un manifestacion final contra hisamento di tarifa di coriente. Esaki lider di e organisacion Hendrik Tevreden ta duna di conoce.
Scucha un entrevista cu Hendrik Tevreden
Diaranson ultimo, CAN a tene un reunion na Centro di Bario Tanki Leendert. Eynan Hendrik Tevreden a splica esnan presente tocante e respuesta di gobierno di Aruba pa loke ta e demanda di CAN hunto sindicato Topa, Grupo di 7 y cu sosten di partidonan den oposicion pa gobierno no hisa tarifa di coriente cu 15 porciento. Gobierno na e momento ey a duna como respuesta cu si lo bay hisa e tarifa. Sinembargo ayera prome minister Mike Eman a duna di conoce na un un otro grupo di manifestante cu ta negociando ainda cu productor di coriente WEB ariba e tarifa.
For di e reunion na Tanki Leendert a sali na cla cu kier sali manifesta un ultimo biaha. Pero prome cu fiha un fecha kier wak si tin mas sindicato cu kier uni nan mes na e protesta. “Nos kier concretisa un par di cos cu un par di sindicato cu no tabata cu nos ultimo biaha”, segun Tevreden. Tambe tin otro gruponan – di cual e no ta menciona nomber – cu lo tin plan pa tene accionnan chikito prome y despues di e ultimo manifestacion aki.
Ultimo biaha
Motibo pakico a lo menos pa CAN esaki lo bay bira ultimo manifestacion ta segun Tevreden pasobra gobierno a fiha su posicion caba dor di indica cu e cambio di tarifa ta bin toch. Si despues di e manifestacion gobierno for di un banda y manifestantenan for di otro keda persisti, por sigui manifesta cu e exigencia cu gobierno mester baha. Simenbargo pa yega na e paso aki tur e stakeholders den e movimento di protesta mester tin nan nanishi den mesun direccion. “Sino e ta bira dificil”, segun Tevreden.
Sistema parlamentario nobo
Mas leu cu e manifestacion, Tevreden ta boga pa un reforma den e sistema di gobierno di Aruba, den cual na su parecer parlamento ta bira instrumento di un gobierno mayoritario en bes cu e ta e organo mas halto cu ta controla y instrui gobernantenan. Tevreden kier yega na un sistema nobo den cual pueblo por haya un participacion mas directo.
Autor: Ariën Rasmijn