Toochie Meyers ta protestá den parlamento – potrèt Today / Leo Brown
PHILIPSBURG – Formadó Theo Heyliger djaluna a disidí di keda sin presentá su tim di minister na gobernador Eugene Holiday. Esaki pa motibu di e problemanan rònt di e instrukshon ku Konseho di Minister di Reino a duna gobernador djabièrnè. Holiday no por firma nombramentu te ora ku un investigashon di e integridat di e kandidatonan, bou di guia di Hulanda, terminá.
Parlamentu di Sint Maarten djaluna a reuní kasi sinku ora tokante e instrukshon. Si kontinuá e reunion djarason meinta, Heyliger su Verenigde Volkspartij (UP) ta presentá un moshon kaminda lo pidi gobernadó pa no ehekutá e instrukshon. Oposishon lo sostené e moshon aki.
Miembronan di parlamento ta konsiderá e instrukshon komo inkonstitushonal, pero nan sa ku gobernador tin destino den su mannan. Pesei diferente parlamentario a apelá na gobernador pa no ehekutá e instrukshon. Gabinete di gobernador no a reakshoná ainda.
Ko’i sushi
E instrukshon a bini djis despues di publikashon di e rapòrt di integridat di PricewaterhouseCoopers. E frakshon di UP ta partí tokante di e rapòrt. Johan Leonard i Silvio Matser mas o ménos a bisa tir’é den koí sushi. Nan lider di partido Heyliger a enfatisá ku un gobièrnu ku su partido ta forma parti di dje lo ehekutá e rekomendashonnan.
Servisio sekreto
Promé minister demishonario Sarah Wescot-Williams, ku djaluna a tuma su papel dòbel di presidente di parlamento, siman pasá a deklará ku minister Ronald Plasterk (Relashonnan Interno i Asuntunan di Reino) lo ker a laga servisio sekreto hulandes operá bou di bandera di Sint Maarten su VSDM. E servisio bou di òrdu di Wescot-Williams lo mester a investigá e kandidatonan pa puesto di minister. Ora el a nenga e óferta’ aki Plasterk a bai Konseho di Minister di Reino.
E instrukshon kasi no ta duna Sint Maarten e chèns di resisití. Un kaso sumario a base di un akto ilegal kasi sigur lo no tin chèns di logra, mirando e kontenido di e rapòrt di integridat di PwC. No por bai Raad van State tampoko ya ku ta Konseho di Minister di Reino mester duna pèrmit p’esaki. E konseho a yega di laga sa kaba ku e no ke mete den disputa entre pais di reino.
Komishon di disputa
Tur esaki a reforsá e gritu pa un komishon independiente di disputa. Lantamentu di un instituto asina ta parti di e reformashon estatal di 2010. Sint Maarten, Aruba i Kòrsou regularmente a insistí, mientras ku Hulanda ta keda sin reakshoná. Esaki a pone ku ta mira e instrukshon komo un atake riba outonomia i di atentonan pa hasi e pais e ‘ofisina prinsipal di BES’.
E parlamentario nobo nobo di UP, Silvio Matser – na desèmber dilanti wes pa evashon di belasten di 3.2 mion dòler – a sugerí ku tin ‘traido’ riba e isla ku riba òrdu di Heyliger ta pasa informashon espesialmente pa e parlamentarionan hulandes Bosman i Van Raak.
Kumpramentu di voto
Lider di oposishon William Marlin a mustra ku e promé akusashonnan ku Heyliger a kumpra voto na 2010 a bini di Ronald Duncan, e tempu ei minister di Asuntunan Konstitushonal di Antia Hulandes i despues minister di Hustisia di Sint Maarten.
Marlin a referí tambe na e skandal di soborno di Bada Bing. Den esaki e doño di nightclub Jaap van den Heuvel a deklará ku el a traha un vidio di parlamentario Patrick Illidge riba òrdu di Heyliger, kende asina ker a pone Illidge retirá su sosten di gobièrnu.
No ta konosí ainda ki dia formadó Heyliger ta bai presentá su tim di minister. Bou di e sirkunstanshanan aktual ta parse hopi manera esaki lo bai dura poko tempu, te ora e mal tempu di e instrukshon pasa.
Outor Hilbert Haar