Lydia Emerencia – foto: Extra Bonaire
KRALENDIJK – Sekretario di estado Sander Dekker enkargá ku Enseñansa ta ataká Komunidat di Skol Boneriano (SGB) di forma infundá. Esaki direktiva di SGB ta duna di konosé relashoná ku e ekspreshonnan di Dekker siman pasá durante un debate di enseñansa na Hulanda Karibense.
Direktor general Lydia Emerencia ta duna di konosé ku e skol mester di tempu i espasio pa kana su propio trayekto di mehorashon di enseñansa. Pa mas tarda promé di desèmber SGB mester entregá su plan di mehorashon na ministerio di Enseñansa, Kultura i Siensia (OCW).
Belkis Osepa den kombersashon ku Lydia Emerencia
Kritika
E plan ta sirbi pa drecha e kalidat di enseñansa na e úniko skol sekundario na Boneiru i sòru pa e enseñansa yega e nivel básiko di enseñansa manera e ta konta na Hulanda. Dekker tabata krítiko riba SGB durante e debate. El a duna di konosé ku si e no tuma nota di mehorashon i no ta sigui konsehonan di Hulanda, por sigui sankshon. “No tur bia ta risibí e sosten ofresé ku gratitut”, asina Dekker a bisa. “Nan ta kere ku nna sa mihó.”
E direktiva di SGB ta haña e ekspreshonnan di Dekker negativo i dañino pa e skol i pa henter Boneiru. “No a tuma kontakto ku e direktiva ku ta esun ku tin e outoridat final i responsabilidat final di e skol. E forma di komuniká aki ta karesé di un falta di rèspèt pa su direktiva, direkshon i personal.”
Konhunto
Lydia Emerencia ta kompartí e pensamentu di su direktiva i ta lamentá e ekspreshonnan di Dekker. Nos tur mester traha huntu i pone konhuntamente nos skouder bou di SGB, asina el a komentá. “E meta prinsipal ta pa duna bon enseñansa na hubentut di Boneiru denter di e konteksto dje isla. Nos mester yega na e strategianan korekto pa mehorashon. No por kompará nos situashon ku esun na Hulanda.”
SGB tin bastante problema riba tereno di dunamentu di lès, falta strukturral di dosente i sosten profeshona nesesario. Tambe problemanan di maneho ta struktural i e resultadonan di enseñansa ta keda atras. Aparte di tur esaki e skol tin di aber ku mayornan i alumnon an malkontentu.
Finansa
Emerencia ta enfatisá ku e skol mes ke sigui traha riba su trayekto di mehorashon kaminda ta inkorporá ekspertisio i eksperensha di tur dosente i profeshonal di SGB. E diskushonnan entre SGB i OCW ta tokante finansa i e strategianan adekuá pa yega na mehorashon. Pa e punto delaster nos ta pidi mas komprenshon, asina Emerencia a bisa.
Direktiva di SBG ta hasi un yamada na Dekker pa un diálogo habrí i honesto kaminda ta skucha otro ku rèspèt teniendo kuenta ku e outoridat i responsabilidat di otro. Resultadonan i rekomendashonnan despues di un investigashon lo sirbi komo guia pa e trayekto di mehorashon ku mester tuma lugá na SGB.
Outor Belkis Osepa