Penshonadonan foto: Belkis Osepa
KRALENDIJK – Netamente dia 15 di desèmber, dia ku ta selebrá Statüt, korte di apelashon lo dikta veredikto di e kaso relashoná ku igualdat di penshun. Ayera abogado Michiel Bijkerk a splika korte un bia mas ku e penshun AOV ku penshonadonan di Boneiru, Saba i Statia ta risibí ta diskriminatorio. “No a tene kuenta ku nesesidatnan básiko di penshonadonan na e tres islanan. No por trata dos hende den mesun pais desigual. Si riba e dia ei nos gana e kaso ta duna un dimenshon nobo na e idea di Statüt.”
Algu mas ku trinta penshonado a presentá djarason mainta na korte na Fort Oranje pa duna sosten na e kaso di igualdat di penshun pa penshonadonan di Boneiru, Saba i Statia. Nan kier a respaldá abogado Michiel Bijkerk ku a bringa pa nan derechi dilanti tres wes.
Entrada èkstra
Lourdes Winklaar tin kasi 63 aña. E ta penshonado, pero ta traha ainda. Winklaar ta kontentu ku e tin un trabou den sektor di kuido. Asina e tin un entrada èkstra banda di su penshun di 385 doler pa luna. “Mi tin ku traha pasobra e sèn no ta yega. Lo mi ke gosa di mi penshun i wak mi nietunan, pero no por.”
El a traha diestres aña na Hulanda i ta spera ku ora e hasi 65 aña e ta haña su parti di penshun di Hulanda. awor e tin su gastunan regular i tambe e ta pagando basta plaka na belásten. Ku su nietu di un aña Winklaar a bai korte pa tende desaroyo di e kaso. Abogado Michiel Bijkerk a representá e penshonadonan Will Johnson (Saba), Reginald Zaandam (Statia) i Aubrey Sealy (Boneiru). Pa di dos bia Bijkerk a presentá den korte, pasobra el a pèrdè e kaso den promé instansha.
Lourdes Winklaar
Nibud
Bijkerk su petishon a keda meskos: ‘Nos ta pidi igualdat di penshun na BES, meskos ku na Hulanda.’ E biaha aki Bijkerk a usa e rapòrt di Nibud ku ta e instituto nashonal pa informashon di bùdjèt, pa fortifiká su argumentashon durante tratamentu di e kaso. Nibud a konstatá ku siudadanonan di BES ta risibí 2.5 bia ménos AOV ku un penshonado na Hulanda. E AOV kompletu na BES ta 577 doler, mientras tantu un penshonado soltero tin derecho pa risibí 1451 doler.
Abogado Luigi Virginia a representá estado hulandes durante e kaso den korte di apelashon. El a argumentá ku no ta trata du penshunnan ku ta similar. Aki e ta referí na e situashon di un penshonado na BES i un penshonado na Hulanda. Virginia a argumentá ku AOV na BES no ta kontradesí e stipulashonnan di igualdat, ni e no ta diskriminatorio.
Palabrashon
Virginia a bisa mas aleu ku e kaso di apelashon no ta hustu i e eksigensha no ta fundá. El a trese dilanti ku promé ku 101010 gobièrnunan di tur e islanan i Hulanda a yega na akuerdonan pa ku penshun pa siudadanonan di e tres islanan. “Mester a yega na un trankilidat legislativo, i pesei a fris tur kos. A akordá ku poulatinamente lo analisá kon leu por yega na kambionan. esei lo mester sosodé ora investigashonnan pone tur kos den perspektiva. Abase di esei politika hulandes no disidí si mester bin adaptashon. Esaki ta palabrashonnan ku entidatnan polítiko a hasi.”
Outor Belkis Osepa