Meet & Greet di komishon evaluashon na Saba – potrèt: Hazel Durand
THE BOTTOM – “Saba berdaderamente ta un parti di Hulanda, esei ta e pregunta fundamental ku nos ke haña kontesta riba dje durante e evaluashon di Hulanda su renobashonnan estatal”, asina diputado Chris Johnson ta bisa.
Johnson durante e Meet & Greet ku e komishon di evaluashon di e státùs estatal a bisa ku Saba ta mira gobièrnu hulandes komo hipókrata den su aktuashon ku islanan BES. “E haltura di penshun i onderstant ta bou di e límité di pobresa riba e islanan. Esaki na Hulanda nunka lo no aseptá. E pregunta ta pakiko den otro partinan di reino si e ta aseptabel.”
E ‘Meet & Greet’ na Saba a bai trankil, kontrali na e enkuentro na Boneiru. Ei e enkuentro a bai akompaña pa un manifestashon di boneriano ku tabata pro un referèndem.
Burokrasia
Johnson a indiká tambe ku eilandsraad ta frustrá pasobra e direktivanan di Oropa no ta práktiko pa Saba. “Un ehèmpel ta e dunamentu di pèrmit di trabou. Pakiko e skol médiko lokal mester pone atvertensha seis siman largu ku nan ta buska un dosente Microbiologia, loke na Saba no tin na granèl. No ta lógiko ku un isla di dos mil habitante mester tene su mes na asina tantu burokrasia.”
Djaluna anochi un grupo chikitu di siudadano a bini huntu na stadhuis pa skucha i hasi e komishon pregunta. Un di e presentenan di ku a bini tiki hende pasobra e hendenan ta kansa di tur e komishonnan ku konstantemente ta bini e isla pa investigá e asuntu.
Outor: Hazel Durand