E kuater banderanan di reino – potrèt Jamila Baaziz
DEN HAAG – Hulanda no por obligá e paisnan karibense pa kambia reino den un mankomunidat. Sinembargo Tweede Kamer ta filosofiá awe tokante un plan p’esaki di VVD i SP.
VVD i SP ta bisa ku nan ta buska espesialmente ‘klaridat i un vishon’ i ku nan nota di inisativa nan ke ‘duna empuhe na e diskushon’. Pero PvdA, ChristenUnie (CU), CDA i D66 no ke ekskluí opshon. “Esei no tin sentido si e paisnan no mira probecho den un mankomunidat.”, asina Gert-Jan Segers (CU) ta bisa. “No ta nos ta na turno.”
E diferenshanan grandi di opinion entre e parlamentarionan presente ta sali rapidamente den e deliberashon. E inisiadónan André Bosman (VVD) i Ronald van Raak (SP) ta enfatisá ku nan ke kita for di e aktual ‘lasonan pèrtá’ i di e responsabilidat final hulandes pa desaroyonan den Karibe. Ta pesei nan ta proponé un konstrukshon di mankomunidat kaminda e paisnan ta kompletamente outónomo pero por koperá sí si nan palabrá esaki.
Ekivalensia
E parlamentarionan ta bisa ku nan ta dispuesto pa den un konstrukshon di mankomunidat hasi kompromiso individual ‘saliendo for di igualdat’ tokante unda Hulanda lo duna ayudo i bou di ki kondishon i ki ora nò. “Nos no ke kibra tur laso manera sa pensa de bes en kuando. Pero nos ke pa porfin e lasonan bira mas kla”, segun Bosman.
Nenga
E igualdat di e proposishon ta pone sí ku Hulanda tambe por nenga un petishon pa koperashon, e miembro di PvdA Roelof van Laar ta bisa. Pesei e ta puntra su mes si VVD i SP no ta presentá nan proposishon mas bunita ku nan ta. “Kon bo ta bai lucha kontra pobresa i kon bo ta dil ku trafikashon di hende i korupshon si e partidonan polítiko den e paisnan karibense no ta sirbi e interes general? Pakiko no ta wak e posibilidatnan den statüt?” Su partido ke laga tur posibilidat estatal pa e paisnan habri i ku posibilidat di deliberashon.
“Pero tin un base di sosten pa e plan aki den e paisnan?” esaki ta e pregunta di Segers di CU ku durante e kombersashon ta representá D66 i CDA tambe pasobra nan no por ta presenté. “E lasonan den reino ta feila, ma no ta na nos pa disidí algu tokante di esaki unilateralmente.” E ta preferá warda e resultadonan di e evaluashon di e kambionan estatal. “Pa mi ta relevante ku nos ta dil ku gobièrnu, korupshon i pobresa.”
Kibra
E miembro di PVV Sietse Fritsma ta haña un mankomunidat un proposishon ‘den bon direkshon’, pero e ta preferá pa Hulanda mes por disidí ‘pa kibra e lasonan ku e paisnan’. Ta pesei e ta preferá bringa un tratado di Nashonnan Uní (NU) ku Hulanda a firma, pero e proposishon ei no ta haña atheshon.
Diskushon
Ounke e deliberashon no ta terminá ku un konklushon òf un akshon di kontinuashon esnan ku a pensé ta bisa ku nan ta espesialmente kontentu ku e diskushon. “Statüt i reino ta den moveshon kontinuamente. Naturalmente e inisiativa ta serka e paisnan karibense pa kambia e relashonnan, pero esei no ta kita ku nos tambe por tin un opinion tokante futuro. I si bo bisa nò riba mankomunidat i alabes statüt tambe ta duna bo doló di barika, mi tin gana di tende un alternativa. Mi ta spera ku e islanan ta bai hiba e diskushon aki awor”, asina Bosman ta bisa.
Outor Jamila Baaziz