Studiante i dosente di Sociale Kans Traject – Potrèt: SKJ
THE BOTTOM – Alumno ku a kita skol na Saba ta haña un oportunidat pa kaba un edukashon MBO 1 ku e Sociale Kans Traject (SKJ) di Saba Reach Foundation.
Último kuater luna studiante a prepará via un trayekto preliminar, ku a desaroyá huntu ku e fundashon ruman FORMA di Boneiru. Supervisor di Boneiru tambe a duna training na e dosentenan di Saba.
Rutina di skol
E trayekto preliminar a yuda e studiantenan pa drenta bèk den un rutina di skol. Además e fókùs tabata riba desaroyo di habilidat sosial. “Nos ta traha huntu ku FORMA pasobra e fundashon aki tin un programa fuerte ku ta rekonosé na Ministerio di Edukashon, Kultura i Siensia hulandes (OCW)”, direktor La-Toya Charles di Saba Reach Foundation ta splika. Entretantu e alumnonan a kuminsá ku e edukashon.
SKI ta haña ayudo di Gwendolyn van Putten School na Sint Eustatius pa e transishon di alumno di enseñansa sekundario pa MBO 1. Pasobra e skol di enseñansa sekundario na Saba no a bai di akuerdo ku e trayekto, OCW a rekomendá pa drenta un kolaborashon ku Gwendolyn van Putten School.
Módulo
E programa ta konsistí di sinku módulo: career and citizenship, Idioma hulandes, Idioma ingles, matemátika i workshop. Sinkuenta porshento di e programa ta konsisti di stazje kaminda e studiantenan ta kore stazje ocho ora pa dia diesocho siman largu. Algun studiante ta kore stazje na un programa despues di skol, Openbare Werken, of serka un kompania komo security guard.
“E studiantenan ta reakshoná bon riba e programa. E ta duna e studiantenan bista riba e merkado laboral i kon nan mester trata ku diferente responsabilidat”, dosente Vincent Stroom ta bisa. “E alumnonan ta bisa ku nan ke kaba e trayekto i nan ta komprondé ku ta un chèns ku nan mester probechá di dje. Mi ta gusta yuda studiante den e fase aki di nan bida.”
MBO 2
Charles ta bisa ku pa alumno ku a kita for di skol sekundario prome ku nan kaba, pero ku a haña un sertifikado si, e trayekto di MBO 1 ta un preparashon pa bai MBO 2. Ku un evaluashon fin di aña ta determiná kua studiante por sigui pa MBO 2, ku nan por sigui na Saba òf den otro parti di reino.
OCW ta finansá e material pa skol, e salario di e dosentenan i e beka mensual pa e studiantenan. E beka ta nobo na Saba. Un studiante por risibi entre 150 te 188 dòler pa luna, dependiente di e porsentahe ku nan ta presente den e lèsnan.
“Aktualmente nos tin ocho studiante ku a inskribí i ku ta bini e lèsnan regularmente. E studiantenan ta bisa ku nan ta mira un kambio den nan bida. E dosentenan i SKI ta mira e mayoria di e studiantenan krese hopi”, segun Charles.
Studiante Alejandro Benders aktualmente ta sigui e trayekto MBO 1, despues ku el a kita di skol sekundario ku un sertifikado. Benders ta kore stazje komo bewaker na un banko. E ta gusta traha den dia i bai skol anochi. “Awor mi ta komprondé kon importante un diploma ta pa bo haña un bon trabou. Mi ke sigui e lèsnan ku òf sin beka mensual”, Benders ta konta. E ta bisa ku e por usa e beka mensual bon pa kubri su gastunan.
Outor: Hazel Durand