André Bosman – potrèt: Jamila Baaziz
DEN HAAG – Raad van State ta keda husga negativamente tokante Lei di Bosman, e proposishon di lei di e miembro di VVD André Bosman pa pone eksigensha na e libertat di antiano pa establesé na Hulanda.
Esaki a sali for di un di dos konseho di e Raad tokante di e proposishon na Tweede Kamer.
E Raad ta ked’ariba ku no por djis hasi eksigensha na tur antiano ku ke establesé na Hulanda for di Aruba Kòrsou i Sint Maarten. Esaki ta ‘muchu amplio i indiferenshá’. Ademas Raad van State no ta kere ku ku e eksigenshanan aki ta efektivo pa alkansá e meta deseá di e lei: redusí yegada di antiano ku poko perspektiva na Hulanda.
Te ainda tin pregunta tambe seka e punto di salida ku den e proposishon ta hasi diferensha entre hende hulandes a base di e lugá kaminda nan a nase. Ademas e Raad ta haña ku e ora ei mester wak pa kada pais kon grandi, bon mirá, e problema ta. Ke men: kuantu hende di kada pais ta kai den kriminalidat na Hulanda i kuantu ta hasi uso di ònderstant.
Strafblat
Bosman ker a sa tambe si ta posibel pa apliká e lei solamente riba hende ku un strafblat òf sin kalifikashon di start (un trabou òf sufisiente plaka pa mantené su mes, red.). Pero Raad va State no ta mira kon esaki por bai funshoná bon den práktika.
Pasobra e úniko manera ku por husga bon tokante un strafblad òf kalifikashon pa start ta di pidi tur arubano, kurasoleño i hende di Sint Maarten ku ke biba na Hulanda e datonan aki i laga husga nan. I Raad no ta haña esaki deseabel.
E Raad a kontestá e preguntanan tokante e lei di inisiativa di Bosman, ku a entreg’é. Bosman a hasi e preguntanan atrobe pasobra otro partido den Tweede Kamer tabata krítiko tokante e proposishon di lei.
Outor Jamila Baaziz