Buskadó di asilo Vladimir Makarenko ta hasi trabou di boluntario den e santana históriko pegá ku Iglesia Reformá – potrèt: The Daily Herald / Althea Merkman
ORANJESTAD – E dos hòmbernan ukraino ku na luna di mei a keda pegá na Sint Eustatius mester bandoná e isla den kuater siman. Asina Servisio di Imigrashon i Naturalisashon (IND) a disidí.
Taras Vakarchuk (26) i Vladimir Makarenko (25) a sali for di Ukraina pa un vakashon riba un barku di bela den Karibe. E kompañeronan di biahe, despues di un konflikto ku e kapitan, a keda atras na Statia i via embahada ukraino na Washington nan a tende ku lucha a estayá den e region ku nan ta bisa ku nan ta bini di dje. Djei nan a pidi asilo polítiko.
Sekretario di estado di Seguridat i Hustisia Fred Teeven a rechasá nan petishon, pasobra el a haña e situashon na Ukraina sufisientemente seif. E ukrainonan a ophetá i ku un prosedura hudisial a fòrsa ku nan por a warda e resultado di nan apelashon na Statia. Awor atrobe IND a rechasá e petishon pa un pèrmit di estadia pa tempu definí, pasobra no ta konsiderá e dos hòmbernan komo refugiado.
IND ta bisa ku segun e último notisianan ainda tin lucha entre separatista i ehérsito ukraino den e region di Donetsk, pero ku sobrá di e pais ta seif. E personanan konserní sin problema por biaha drenta nan pais i keda einan.
Persekushon
Segun IND no ta trata niun ora so di miedu hustifiká di persekushon. E buskadónan di asilo a trese dilanti ku na ora ku nan yega nan pais ehérsito lo mobilisá nan. E dos hòmbernan no a sali nan pais pa motibu di opheshon kontra servisio militar òf desershon sino pa vakashon, asina IND ta bisa.
Makatenko a laga sa kaba ku e lo apelá
Outor: John van Kerkhof