Ramonsito Booi i Burney El Hage – potrèt Belkis Osepa
KRALENDIJK – E apelashon di e kaso Zambezi lo tuma lugá dia 11 pa 13 di mart nèt un siman prome ku elekshon lokal na Boneiru. Esaki sospechoso Ramonsito Booi a duna di konosé. E koinsidensia di elekshon i e apelashon a pone Booi disidí pa entregá su retiro komo miembro di Konseho Insular pa partido UPB.
Booi i èks diputado Burney El Hage a haña apsolushon na aprel e aña aki den e kaso di Zambezi. Ta trata di e kaso di korupshon, pero ku a keda di suak despues di tempu pasobra no a pèmití tratamentu di e echonan di korupshon atministrativo. Ministerio públiko ta konfirmá ku e apelashon ta tuma lugá na mart.
E kehonan ku korte supremo lo atendé na mart 2015 ta pa El Hage falsifikashon i labamentu di plaka den kuadro di un froude di hipotek. Booi lo bolbe aparesé den korte pa falsifikashon relashoná ku benta di un tereno.
Kansa
“Mi ta kansa”, asina Booi ta bisa. E ta duna di konosé ku e no por atendé su kaso, e kampaña di elekshon i tambe su trabou den konseho insular. “Siman pasá mi a sinta na mesa ku mi abogado Knoops. Pasobra e apelashon ta nèt un siman promé ku elekshon, mi no ta haña ku ta responsabel ni pami, mi famia, mi partido UPB i pa Boneiru pa mi keda den konseho insular.”
Sospechosonan den kombersashon ku abogado na mrt foto Belkis Osepa
Tòp abogado Geert –Jan Knoops ta konfirmá ku su tim lo asesorá Booi I e pareha El Hage atrobe den e kaso. “e apelashon tat rata solamente dje echonan kun an a haña apsolushon p’é. E echonan di korupshonno ta forma parti di e kaso aki. E kasashon ku ministerio públiko a pidi ta ainda serka korte supremo. No ta konosí ki dia tin sentensia den e kaso di kasashon aki.”
Bosero di ministerio públiko Norman Serphos ta informá ku Knoops a hasi un petishon pa e kaso tuma lugá na Kòrsou. Knoops a konfirmá esaki. Durante e promé tratamentu di e kaso e aña aki e tim defensor hulandes mester a oper’a bou di ala di un abogado lokal. Serphos: “No a tuma un desishon ainda tokante esaki.”
Opiná robes
Ramonsito Booi a mira miembro di konseho insular na mei ‘ultimo atrobe. E ta bisa ku el a aseptá e asiento despues ku el a haña apsolushon na aprel. “Mi tabata sa si ku e chèns pa apelashon tabatei. Podisé mi a opiná robes i a pensa ku e apelashon lo a tuma lugá mas tempran i no despues di kasi un aña, dje serka asina di e elekshon. Ta nèt ora kampaña di elekshon ta na su punto kulminante i esaki no ta kuadra ku e kaso den korte.”
No ta konosí ainda ken lo tuma Booi su lugá den konseho insular pa UPB. Segun lider di frakshon Jeffrey Levenstone ta prematuro pa meshoná nòmber di e miembro nobo. E siguiente riba lista di elekshon di 2011 Elvis Tjin Asjoe. El a gradisí pa e asiento, asina Levenstone ta bisa. E aña aki Tjin Asjoe a kibra ku UPB i a lanta su mes partido Movementu di Pueblo Boneriano (MPB).
Plèitu
Nooi ta desmintí ku denter di UPB tin un plèitu i pa e motibu ei el a tuma su retiro. “Natural mi desishon lo trese hopi spekulashon kuné. esi bo no por evitá. Pero e relashon den partido ta bon. Si mi mester bisa ku e situashon ta difísil, pasobra komo esun saliente lo interpretá bo opinion komo reklamo.”
Outor Belkis Osepa