Tur hende por kana rònt libramente banda di e kònteinernan yen di vürwèrk – potrèt: Elisa Koek
BRIEVENGAT – “E sitio na Brievengat no tabata nos promé eskoho pa un krùithùis nobo”, Edmiro Anita, Hefe di Prevenshon na brantwer ta konta. “Pero despues di e eksploshon di krùithùis na Seru Loraweg mester a bini un sitio nobo purá i minister a skohe pa esun aki.”
Segun Anita ta vigilansha ta e problema: Lo tin vigilansha solamente un parti di aña. Durante un bishita na e krùithùis nobo ta resultá ku no tin vigilansha anto ademas hende sin outorisashon por yega serka di e kònteinernan fasilmente pasobra e tranké no ta sólido.
Promé ku e eksploshon na Seru Loraweg gobièrnu tabata buska un bon sitio kaba pa un krùithùis nobo. “Huntu ku Dienst Openbare Werken nos tabata wak un luga den e parti ost di Kòrsou ku tabata kumpli ku tur eksigensha. Despues di eksploshon mester a trasladá e vürwèrk rápidamente i a skohe pa e tereno di industria na Brievengat. E ora ei nos duna konseho tokante e sitio aki.” E konseho ei ta kontené opstákulo i punto pa drecha.
No tin awa pa paga kandela
“Un opstákulo ku nos tin ta e disponibilidat di awa: no tin awa pa paga kandela den besindario. Un otro opstákulo ta ku e ruta ku mester kore pa yega na e sitio ta bou di bientu i asina nos mester kore pasa den huma i esaki ta hasi e pagamentu di e kandela mas difísil.”
Puntonan di mehorashon entre otro tabata e falta di seguridat i un tranké ku no por a sera. Te awó no a solushoná niun di e puntonan aki, pero segun Anita e lugá tin e bentaha si ku e ta keda mas leu di áreanan abitá. “E ta poko mas leu di kasnan di biba òf otro edifisio ku e krùithùis na Seru Loraweg, pero ainda e no ta berdaderamente den un zona seif.”
Outor: Elisa Koek