Eks-studiantenan durante enkuentro ku Marilyn Alcalá-Wallé Foundation – potrèt: José Manuel Dias
WILLEMSTAD – Te ainda tin un gran kantidat di eks-studiante ku no a haña un oferta serka Dienst Uitvoering Onderwijs (DUO) pa un areglo di pago nobo. Esaki apesar ku na ougùstùs di aña pasá a primintí tur eks-studiante ku tin un debe atrasá di estudio, ku nan lo haña un oferta promé ku fin di aña.
Asina a sali na kla durante un seshon informativo organisá pa Marilyn Alcalá-Wallé Foundation ku a tuma lugá dia 15 di yanüari último na International School. E mas o menos sesenta eks-studiante ku tabata presente a hasi uso di e enkuentro aki pa haña aklarashon riba e areglo di pago nobo i alabes eksponé nan preokupashonnan tokante nan eksperiensha ku DUO.
Un reportahe di José Manuel Dias
For di e reunion aki a sali na kla tambe ku pa motibu di malkomprondementu te ainda tin eks-studiante ku no a manda e deklarashon di forsa finansiero (draagkrachtmeting) pa DUO. Sin e informashon di entrada aki DUO no por hasi un oferta i konsekuentemente e eks-studiante no por hasi uso di un areglo di pago faborabel.
Falta di personal
Segun splikashon di Marilyn Alcalá-Wallé e retraso ku DUO tin aktualmente den prosesamentu di e tres mil studiantenan ku tin debe atrasá ta debi na falta di personal. “Aktualmente DUO tin únikamente sinku funshonario disponibel pa atendé ku eks-studiantenan di Kòrsou”.
Dia promé di sèptèmber di aña pasá DUO a kuminsá prosesá e promé kategoria ku ta esun di mas grandi i a terminá ku esaki dia 22 di novèmber último. A repartí e diferente kasonan di debe atrasá den kuater kategoria di kual kategoria number unu ta esun di mas krítiko. Den e kategoria aki bo ta haña e kasonan kaminda e persona no tin e forsa finansiero pa paga e debe bèk.
Outor José Manuel Dias