Agnes Cobelens ta yuda mamanan ku tiki moda pa duna lus na kas pasobra nan no por paga kuido despues di parto | Potrèt: Jean Mentens
WILLEMSTAD – Korte Oropeo na aña 2010 a konkluí ku si nenga kompensashon finansiero pa duna lus na kas esaki ta kontra e Tratado Oropeo pa Derechonan Humano. Tur hende muhé tin e libertat di skohe pa duna lus na hòspital, na klinik di maternidat òf na kas. Un gobièrnu no mag apliká un diferensha den supsidio di esaki.
Kòrsou ta parti di Reino Hulandes, pero Sociale Verzekeringsbank (SVB) no ta paga asistensia médiko pa un parto na kas kompletamente, kontrali na un parto na hòspital òf klinik di maternidat. Un grupo chikí di mama hóben a disidí di bringa esaki i ta desidido pa haña nan rason.
Abogadonan Bokkes a yuda e damanan i na 2013 a skibi SVB un karta. SVB su reakshon a duna speransa ora nan a rekonosé ku en berdat ta paga tur gastu. “A base di e echo ku Seguro Básiko ta ofresé e posibilidat pa un persona sigurá duna lus na kas i ku e seguro ta paga e gastunan di partera i kuido despues di parto, SVB ta di opinion ku e legislashon i regulashon ta korespondé na derecho oropeo”, direktor di SVB, Philip Martis ta skibi na sèptèmber di aña 2013.
Rechaso
Ora na 2014 e damanan a entregá nan kuentanan, SVB a ninga di paga esakinan. Partera Agnes Cobelens na desèmber di 2014 a pidi SVB un splikashon. E biaha aki Martis a bisa ku ‘den kaso di partera Agnes ta gastu di partera so ta paga’. No ta paga e mamanan e gastunan di kuido despues di parto.
E rechaso ta un desapunte, pero e damanan no tin intenshon di stòp. “Mi no ta paga nada”, Jiovanca Hous ta bisa. E ta mama di tres yu. Na Hulanda el a duna lus un be na kas i un be na hòspital pa motibu di komplikashon. Na Kòrsou el a ninga di duna lus na hòspital. “Mi ta haña eiden teribel i mi promé parto na kas a kai na agrado. Ta mi derechi di skohe unda mi ke duna lus i SVB mester paga.”
‘Konfia nos kurpa’
Hous i e otro damanan ta sinti manera hende muhé na Kòrsou hopi be no konosé nan derechinan i pa e motibu ei no ta sali na nan propio defensá. “A bira tempu pa hende hòmbernan i gobièrnu rekonosé ku nos mes por skohe loke nos ke”, Diantha Rodrigues Pereira ta bisa. E mes ta coach di embaraso i hopi be e ta mira hende muhé ta adoptá un posishon dósil. “Tin be e kasá òf kompañero di un hende muhé tin mas miedu ku e mes. Esnan rònt di dje ta insistí pa e duna lus na hòspital kaminda e mes no ke esaki. Nos komo hende muhé mester siña konfia nos kurpa i e forsa ku nos tin.”
Tres be mas karu
Partera Cobelens tin añanan kaba ta lucha pa parto na kas. E no por komprondé ku gobièrnu ke ekonomisá nèt riba e gastunan aki. “Un parto den hòspital ta tres be mas karu ku un parto na kas. Pakiko anto ta kastiga e hende muhénan ku ta hasi ménos gastu? E kos aki no ta bon i nos lo sigui pa nos haña nos derecho.
Outor: Elisa Koek