Potrèt: Dick Drayer
WILLEMSTAD – Awe mainta den Korte di Hustisia a trata e apelashon di e sospechoso Kuwas alias Monster, kende a haña un kondena di bida largu pa entre otro su enbolbimientu den e asesinato di polítiko Helmin Wiels. Abogado General Van der Schans a resitá e kuater akusashonnan i hues Ter Berg, huntu ku dos hues mas, a trata tur e puntonan di akusashon i apelashon.
Awe atrobe hues Ter Berg a indiká ku e transmishon bibu di e kaso via radio of internet, ta afektá e abilidat di e akusado pa papia abiertamente, i teniendo kuenta ku esaki awe tambe, no lo transmití e kaso bibu más. Kuwas a drenta sala bou di masha seguridat, bistí ku un chaleko di anti bala.
Dick Drayer ta papia ku Aubert Wiels
Elvis Raphael Kuwas, di 37 aña di edat, ta akusá di a asesiná Helmin Wiels, ta enbolbí den e asesinato di Raikel Consencion i Lionel Arnoud, i último, e atrako riba Héctor Henríquez. Durante e apelashon di Kuwas su abogado Olga Saleh – Kostrzewski a indiká ku a pidi pa tende sinku testigu, pero ta kuater so a presenta. Entre e testigunan tabatin señora Kuwas – Andrea, pero ni Ministerio Públiko ni e abogado di Kuwas no por a lokalisá señora Rombley.
Después ku señora Rombley a haña sèn serka ministerio públiko pa kubrí sierto gastunan, manera un tíket pa biaha pa eksterior, no por a lokalisá señora Rombley niun kaminda, i según abogado Saleh – Kostrzewski, esaki a perhudiká e defensa di Kuwas. Después di un konsulta breve ku su abogado, Kuwas a opta pa laga e testimonio di Rombley kai pa asina por a sigui trata e kaso.
Siguientemente a trata Kuwas su enbolbimientu den e asesinato di Wiels. Durante e periodo di Kuwas su aresto día 7 di Mei 2013 pa aworaki, e akusado a duna diferente deklarashon kontradiktorio. Ora hues Ter Berg a puntra e akusado dikon awe si mester kere su deklarashon, el a splika ku anteriormente e no kier a inkriminá niun hende ku un relato eksakto di kiko a pasa. “Si mi a papia fo’i trempan mi bida lo tabata aún mas na peliger”, según Kuwas. Alabes Kuwas ta tilda Ministerio Públiko di a pone un preshon inmenso riba señora Kuwas-Andrea, kual a pon’é hasi deklarashonnan falsu. Awe e ta para ariba ku e no tabatin nada di haber ku e asesinatonan, pero si ta rekonosé su enbolbimientu den e atrako. Kuwas ta lamenta ku Rombley, kende tabata manager na Héctor Henríquez, no a keda persiguí komo outor di e atrako.
Finalmente a trata e aspektonan personal di Kuwas su bida kende a indiká di a lanta den e mundo di droga fo’i chiki i komo mucha tabata pasa droga ku su mama. Kuwas a kai será na varios okashon na Hulanda i Kòrsou pa delitunan manera atrako i ekstorshon, pero nunka pa asesinato. Den e seshon di mèrdia e abogado general a pidi kastigu di bida largu pa Kuwas.
Outor Deya Mensche