Ofisina di ZVK na Boneiru – potrèt: Belkis Osepa
KRALENDIJK – E ofisina di seguro médiko (ZVK) na Boneiru ku ta regla baimentu afó pa kuido médiko pa Boneiru, Saba i Sint Eustatius ta hañando krítika atrobe. E burokrasia i servisio promé i durante di e trato médiko den eksterior por bira un desbentaha pa e islanan BES.
E trabou atministrativo di e tratamentu médikonan den eksterior na Hulanda Karibense ta envolví asina tantu regla i papel ku e mandamentunan afó ta stanka.
Han de Bruijne tin nuebe aña ta biba na Boneiru i el a skibi minister Edith Schipper di Salubridat Públiko un karta habrí kaminda e ta konta su sufrimentu ora ku e mester a bai Kòrsou pa un saminashon di tripa.
Atministrashon struf
E siman aki De Bruijne a hañ’é konfrontá ku un trayekto atministrativo ku ta kore masha struf na ZVK: formulario ku a pèrdè, permit pa saka ticket ku a bini muchu lat, mal komunikashon, un number di banko ku a pèrdè, kompensashon diario ku a yega lat, kamber di hotel ku no a reservá, remedi robes i referensha pa bai bèk na dòkter di kas sin ku tabata nesesario.
De Bruijne mes mester a buska su ticketnan i laga kambia nan pasobra su estadia afó a bira mas largu. E mes mester a regla su kaminda di keda i adelantá su kompensashon diario. “No opstante e mionnan ku a invertí den un sistema outomatisá”, De Bruijne ta splika Schippers, “ZVK no por regla un mandamentu pa eksterior relativamente simpel na un manera drechi. Mi tin miedu di e momentu ku un mandamentu pa eksterior mas kompliká bira nesesario.”
Problema
E relato di De Bruijne no ta pará riba su mes. Diferente pashènt bonerianu for di 10-10-10 ta dal den duru pasobra e mandamentunan afó no ta bon reglá. Cedric Soleana a konstatá un skala di problema ora ku a mand’é Colombia i despues Hulanda. Aña pasá Mamita Fox a logra un akuerdo ku ZVK i e Representante di Reino Wilbert Stolte, despues di un akshon pasivo ku a dura ocho dia komo protesta kontra abuso den kuido médiko.
For di e tempu ei segun Mamita Fox e prosedura pa manda un hende afó pa motibunan médiko a kambia. Fox ta den un komishon speshal ku tur luna ta reuní ku ZVK pa trata keho ofishal di pashènt. Tambe ZVK ta disidí huntu ku dòkter di kas tokante e tratamentu di pashènt den eksterior. Tur luna ta papia tokante e derechonan di esnan sigurá, e kontinuashon di e kuido i e prosedura di keho.
Investigashon di eksperiensha
Den e resultadonan ku a sali resientemente di un terser investigashon di eksperiensha for di 10-10-10 tin pará ku e idea ku tin di kuido médiko den Hulanda Karibense a mehorá for di e promé investigashon na 2011. Na 2013 61 porshento di esnan ku a puntra ta haña e kuido mihó i 15 porshento ta han’é mas malu. Den e grupo ku ta husga positivamente tokante kuido médiko un kantidat hopi mas grandi ta bisa ku e kuido a bira mas mihó (na 2012 6 porshento i na 2013 22 porshento).
No opstante e sifranan aki tòg ainda tin keho di e trato atministrativo den kuido médiko na Boneiru. E kehonan ta trata e kantidat di papel ku no ta atministrá bon. ZVK lo no ta usa un sistema outomatisá optimalmente pa laga e atministrashon kore drechi.
Outor: Belkis Osepa