Allan van der Ree i Marlon Reina (dr) dilanti di un bùnker di amunishon di Segundo Guera Mundial na Blauwbaai | Potrèt: Dick Drayer
WILLEMSTAD – Dia 16 di februari 1942 ta eksaktamente 73 aña pasá ku Segundo Guera Mundial a yega Kòrsou i Aruba. Atakenan di torpedo di supmarino aleman na Aruba a destruí tènker i otro barku, na Kòrsou torpedo a dal e tènker Rafaela.
Pero pa e habitantenan di e islanan guera a bira visibel hopi mas promé kaba. Un dia despues ku Alemania a okupá Hulanda na Kòrsou a arestá tur hende ku di un òf otro manera tabatin un laso ku Alemania. Un fam ku tabata zona manera aleman so tabata sufisiente kaba pa interná un persona den un kampamentu spesial na Boneiru.
Marlon Reina a nase 25 aña despues di guera i ta okupá su mes espesialmente ku pasado di sklabitut. El a deskubrí ku e no tabata sa kasi nada di Segundo Guera Mundial na Kòrsou, miéntras ku ainda tin testigu ku por konta tokante di esaki. Su mama a nase na 1942, e tempu ku e supmarinonan aleman a lansa e promé atake riba e islanan. Su wela tabata trahadó di limpiesa na Fòrti i a hañ’é mei mei di e notisianan. Reina ker a sa mas di e tempu ei i huntu ku algun otro hende interesá , entre nan Allan van der Ree, a partisipá na e proyekto ‘Guera na Kòrsou’.
Eksposishon
Na mèi e grupo di trabou lo bai organisá un eksposishon den e bodeganan di Museo di Kòrsou tokante e memoria personal di tempu di guera na Kòrsou i e otro islanan. Van der Ree ta manehá e museo di Segundo Guera Mundial na Blauwbaai. Huntu ku Reina e ta apelá na tur habitante di Kòrsou pa buska nan ophetonan personal, arte i kantika di e tempu ei, i pone nan na disposishon di e eksposishon i hiba nan NAAM na Johan van Walbeeckplein. Radio, habon, kortina di blèkout, lusafè: tur kos ku tin relashon ku guera ta bonbiní.
Outor: Dick Drayer
Dia 16 di febrüari 1942 un torpedo di un supmarino aleman tipo U-67 a dal e tènker Rafaela, un kilometer pafó di kosta serka Sint Annabaai | potrèt: uboat.net