Sekretario di estado di Enseñansa Sander Dekker – potrèt: Pieter Hofmann
DEN HAAG – Sekretario di estado Sander Dekker di Enseñansa awe a anunsiá na Tweede Kamer ku el a manda e direktiva di Scholengemeenschap Bonaire (SGB) kas. E motibu ta un rapòrt di inspekshon di enseñansa ku hopi krítika.
Den e rapòrt entre otro tin pará ku e direktiva no tin bista riba e kalidat di e enseñansa i e finansanan. Dekker ta bisa: “Si bo wak e rapòrt di inspekshon bo por puntra: ta kiko sí ta bai bon na e skol ei?”
Inspekshon no ta konsiderá e direktiva di skol kapabel tampoko pa drecha algu na e situashon djawó. Pa Dekker esaki a kousa e desishon pa duna un instrukshon di gobièrnu, e medida di mas pisá ku un sekretario di estado por usa. Su pasenshi a kaba: “Mi ta haña ku e muchanan di Boneiru ya pa muchu hopi tempu no ta haña e enseñansa ku nan tin derechi riba dje. E ora ei ta di bèrdè mes hende bon kalifiká mester drenta den e funshon.”
Plan di mehorashon
E direktiva mes ta bisa ku nan a kuminsá di superá ku ayudo di un plan di mehorashon. Dosentenan tabata haña rekapasitashon i tambe tabata haña ayudo pa oumentá nan abilidatnan didáktiko. Pero segun inspekshon e plan di mehorashon lo no trese ni mihó enseñansa ni mihó maneho, i den futuro tampoko. Dekker: “Inspekshon tin hopi eksperiensha ku otro skolnan ku problema igual, nan sa masha bon kiko lo traha bon i kiko nò.”
Finansa
“E situashon finansiero suak di e skol ta stroba mehorashon. Ta eksáktamente p’esei t’asina importante ku direktiva ta supervisá esaki bon”, e sekretario di estado ta bisa. Inspekshon ta kaba ku e maneho finansiero di e skol i ta bisa ku no tin niun komprenshon di e fluhonan di plaka. Tòg e skol a logra di haña un accountant aprobá e kuenta anual. Segun Dekker esaki no ke men nada. “Bo por tin un kuenta anual aprobá i tòg sali ku pèrdida grandi. “Nunka e skol na Boneiru no a haña tantu plaka manera aworakí. For di 10-10-’10 nos a invertí pisá den enseñansa. Esei ta enserá tambe ku bo kontabilidat mester ta bon na òrdu.”
Kumpli ku palabrashon
Anteriormente ministerio di Enseñansa a yuda. Tabatin e kondishon si ku SGB lo a koperá ku e coachnan di maneho, ku lo a yuda ku e plan di mehorashon. Dekker ta haña ku e skol no a kumpli ku e palabrashon aki. “Esaki ta un moda di hasi ku ta keda ripití i esaki mester kab’un be.”
Direktiva nobo
Pa motibu di e instrukshon e direktiva mester baha pa mas lat medio aprel. Sino lo sigui sankshon finansiero. Dekker: “Si e direktiva aktua na interes di e muchanan nan lo entregá nan posishon. E ora ei rápidamente nos lo pèrkurá pa un direktiva bon pa asina e skol kuminsá kore atrobe.”
Outor Pieter Hofmann