Apertura di aña parlamentario. E intencion di minister Bermudez ta pa entrega presupuesto di 2016 y 2017 riba e dia aki na september proximo. | Foto: Ariën Rasmijn
ORANJESTAD — Gobernador Fredis Refunjol a pone su firma riba e ‘aanbiedingsbrief’ di gobierno di Aruba pa loke ta e presupuesto di 2015. Awo e presupuesto ta cla pa wordo manda pa parlamento.
Minister di Finanzas Angel Bermudez ta anticipa cu tratamento lo mester por tuma luga den di dos siman di april.
Segun e mandatario, presupuesto 2015 ta atene su mes un biaha mas na e regla di e cap di 1,35 billon florin. Tekort den e presupuesto ta 3,8 prociento. “Esey ta hopi mas abou cu e 9 porciento di aña pasa”, segun Bermudez. E lopende rekening tin un saldo negativo di 25 miyon florin. Esaki pa motibo di un gasto di interes di 200 miyon florin.
Riba peticion di gobierno, College Financieel Toezicht (Cft) a fungi como consehero pa e presupuesto. Dos di e consehonan cu Cft a duna tabata pa introduci un asina yama Impuesto di Solidaridad y hisa e impuesto indirecto di bbo pa tres of cuater porciento.
Minister Bermudez a dicidi pa no adheri na e consehonan aki pa cu presupuesto di 2015. “Motibo ta simplemente pasobra nos departamento di impuesto di baina por hala rosea cu e cantidad di impuestonan atrasa cu tin cu cobra ainda. Lo ta dimas pa pidi di SIAD aworaki pa aplica efectivamente un impuesto nobo.”
Segun Bermudez den presupuesto a aplica si otro conseho di Cft: e trahamento di un presupuesto pa 2016 by 2017, unabes cu esun di 2015 keda formalisa. E mandatario ta bisa cu e kier entrega esaki na september.
Minister Bermudez ta keda para riba mantencion di un rol pa Cft como consehero y no como parti integral di maneho manera ta e caso na Corsou y St. Maarten.
Autor: Ariën Rasmijn