Independensha, falta di medida severo rondo di e areglo 80/20 of keda sin eliminá mafia den komunidat ta puntonan trabaoso pa hopi bishitante – potrètnan: Elisa Koek
WILLEMSTAD – Ta manera ku di e miles di hende ku dos aña pasá a asistí na e marcha silensioso pa Helmin Wiels, no a sobra nada mas. Eksaktamente dos aña despues di su morto solamente algun shen hende a tuma tempu pa konmemor’é.
E hendenan ku awe nochi a konmemorá e polítiko asesina ta dividí. Un parti di nan ta na e konmemorashon na Mari Pampun ku Wiels su partido Pueblo Soberano a organisá. Un otro parti ta na e misa na Steenrijk organisá pa 1 Tim Magno, un partido ku Helmin su ruman Aubert a lanta.
No ta e diferente sitionan so ta pinta e desunion den e siguidónan di Helmin Wiels i su partido ku un tempu tabata hopi uní. Mientras ku ta kuminsá kanta himno na playa di Mari Pampun, un hòmber den un kamisa koló krèm di Pueblo Soberano ta hasi uso di e oportunidat pa ekspresá su malkontentu ku e partido. “Sèt di hipókrita, gañadónan” e ta grita rabiá mientras ku e ta hisa su kurpa den su ròlstul. E multitut di hende ta wak rònt ku poko bergwensa i ta trata di kontinuá e konmemorashon.
Malkontentu
E hòmber ta rabiá pasobra Pueblo Soberano no ta sali pa pueblo di Kòrsou i masi hende ta di akuerdo kuné. Independensha, falta di medida severo rondo di e areglo 80/20 of keda sin eliminá ‘mafia’ den komunidat ta puntonan trabaoso pa hopi bishitante. “Wiels tin be tabata manera un bèrdadero diktador, pero e tabata kumpli ku su promesanan”, Winfried Kirindongo ta bisa. “E último dos añanan aki nada no a pasa ma mi no ta ferwagt ku ku Tim Magno si algu lo sosodé. Wiels tabata kambio, pero el a muri. Mi ta mira e kos ta pinta skur, ma mi ta keda Soberano te den mi higra.”
Parlamentario Winifred Raveneau ta komprondé ku tin malkontentu. E ta bisa ku hopi be ta supestimá kon grandi impakto di morto di un lider polítiko ta. “Ta un herida ku mester kura i esaki ta tarda poko. Aworakí nos ta riba e punto ku nos por sigui ku un otro lider, pero nos tambe mester a haña un kaminda nobo pa kana.” Segun e, e echo ku e partido a plama ta parti di e proseso. “Esaki tambe ta duel nos, nos ta spera ku nan lo aserká nos atrobe.
Mientras ku e muzik di fiesta ta sigui na Mari Pampun, klòknan di misa di Steenrijk ta bati. Aubert Wiels i su partido 1 Tim Magno ta tene un misa di konmemorashon. No a bini masha hende: mas o ménos shen hende a bini huntu den e misa. Algun di nan no a bini mes pa e konmemorashon: “Tur djamars mi ta bai misa i pa kasualidat aworaki tin e konmemorashon. E tabata nèchi pero si mi a bisa ku ta pa Wiels m’a bini lo m’a gaña”, un señora ku ta keiru ku su dos yunan ta bisa.
Aubert Wiels mes ta masha satisfecho kon e anochi a bai
‘PS a muri’
Aubert Wiels mes ta masha satisfecho ku e anochi. “Mi a ferwagt ménos hende ku tur e aktividatnan djawe. E asistensia tabata bon.” E desunion den e apoyo polítiko di Pueblo Soberano lo keda si ta na dje. “No tin un kamnda mas pa nos kana huntu. Pueblo Soberano a muri.”
Outor Elisa Koek