Gezaghebber Jonathan Johnson, fiskal mayor Henry Hambeukers, hefe di kuerpo di polis Hildegard Buitink i inspektor hefe Eric Willems – potrèt: Hazel Durand
THE BOTTOM – Kuerpo di Polis di Hulanda Karibense na Saba djárason awor ta haña asistensia di diesun miembro di personal di Polis Nashonal di Hulanda Oropeo, pa investigá morto di e studiante merikano Kavya Guda (24) di Saba University School of Medicine.
Asina inspektor hefe Eric Willems a bisa den un rueda di prensa kaminda gezaghebber Jonathan Johnson, fiskal mayor Henry Hambeukers i hefe di polis Hildegard Buitink tambe tabata presente. Hambeukers ta bisa ku polis sa ku e investigashon tin su influensha riba e skol médiko. “Nos mester papia ku diferente studiante, i pesei tin be nos mester interumpí lès. Pa esaki nos tin mester di sosten di e skol.
A haña Guda morto dia 15 di aprel den su apartamento na The Bottom. E mes siman a manda su kurpa sin bida Hulanda pa outopsia na e Instituto Forénsiko (NFI). Probablemente el a fayesé pa motibu di un krimen. Entretantu a hiba su kurpa Merka.
Estádos Unídos tambe ta duna nan sosten na e investigashon. Riba e isla tabatin rumor ku e aña di skol aki ménos studiante a inskribí. Gezaghebber Johnson ta deskartá esaki ku e splikashon ku mayoria di e studiantenan ta bini di Canada i Merka i ku nan tin kustumber pa kuminsá skol na sèptèmber. Aña di skol na Saba University ta kuminsá na luna di mei.
E aña di skol a kaba di sera ora ku luna pasá a haña Guda morto. E dia ei hopi studiante a sali for di e isla pa bishitá famia, loke a hasi interogashon di testigu difísil.
Tuma kontakto ku polis
Tin un number di telefon spesial pa duna tep (anónimamente): 00599 4166073
Outor Hazel Durand