Miles Maynard | potrèt: Èxtra Boneiru
KRALENDIJK – Miles Maynard, direktor di pòmp di gasolin Gas Èksprès, den deklarashon pa Extra a aklará diferente punto en konekshon ku e seramentu di e pòmp di gasolin aki. E ta di opinion ku Curoil no a kumpli kabalmente ku palabrashonnan ku tabatin loke a kondusí ku e instansia di medio ambiente hulandes sin previo aviso a laga sera e pòmp ku, segun nan, no ta kumpli ku e eksigensianan ankrá den lei.
Maynard a aklará ku no ta su persona e a sera e pòmp, pero ta un persona hulandes-oropeo a yega di ripiente ku un ‘eerste waarschuwing’ i a dal e pòmp sera. Loke Maynard ta haña hopi straño ta e echo ku normalmente ora ku un persona òf kompania haña un atvertensia, nan ta haña un tempu pa asina yega na e solushon i si e persona òf kompania no ta tene su mes na e reglanan ku a pone den e atvertensia, e ora ei nan por pasa pa sera e lugá te asta bai na prosesonan hudisial.
Algun empleado di Gas Èksprès tambe a trese nan mal kontentu i a pidi pa medio di un karta dirigí na prensa pa trese un investigashon pa por bini ku un solushon rápido. Segun Maynard, e empleadonan por keda trankil, pasobra nan no ta bai pèrdè nan trabou.
E rumor ku tin ta sirkulá kuenta di asuntu finansiero di Gas Èksprès, no ta kuadra ku realidat dor ku Gas Èksprès ta paga delantá. Nos no tin krédito, pues ta imposibel pa nos por tin algun klase di debe ku Curoil.
Maynard ta konsiente ku e situashon kaminda Curoil tabata hasi entrega di kombustibel ta peligroso. Tambe a pone Curoil na altura ku tabatin algun tanki di gasolin i diesel na kaminda pa asina eliminá e seru peligroso parti afó i alabes pone tankinan ku mas kapasidat pa evitá ku kada
bia kombustibel ta gasta. Segun Maynard, Curoil tabata na altura di tur e kambionan aki te asta nan tabata sa ku tabatin plan pa sera e pòmp na luna di mei kompletu pa asina pone tur kos na òrdu.
“Ta Curoil su falta ku pòmp a sera di e forma aki. E kos aki ta inkreibel. No ta aseptabel kon un persona por yega i ku e promé atvertensia por dal un negoshi sera, pretendiendo ku ta e ta manda i punto. Ta Curoil ta doño di e tankinan. Ta nan mes a manda e persona di departamentu di labor pa sera e pòmp di gasolin. Lógikamente ta nan mester a buska un forma pa drecha esaki. Pa kasi dos aña mi a papia ku nan pa por yega na algun solushon”, Maynard a trese dilanti.
Maynard ta lamentá kon e hendenan aki ta kue poder aki na Boneiru. Mira kon algun hulandes ke manda asta riba Kolegio Ehekutivo. Nos mester tin hopi kuidou. Extra a puntra Maynard ki dia por spera ku lo habri e pòmp bek i el a kontestá ku e ta kere ku na luna di yüni e pòmp ta disponibel pa pueblo.
Fuente Èxtra Boneiru