Premiere di e pelicula Arubiano ‘Abo So’ durante e ultimo edicion di AIFF na 2013. Foto: Ariën Rasmijn
ORANJESTAD — Despues di a salta un aña pa motibo cu no por a haya financiamento, Aruba International Film Festival (AIFF) ta regresa pa su di cinco edicion entre 7 y 11 di oktober, cu cambionan den organisacion, introduccion di un mercado di cine nobo y cu patrocinio – sinembargo cu menos placa – di Aruba Tourism Authority (ATA).
Ayeranochi AIFF a emiti un comunicado den cual ta anuncia e regreso di e festival di cine y a habri inscripcion pa cineastanan y productornan cu lo kier participa na e diferente competencianan di cine y documentario, pero tambe na e International Film Market Aruba (IFMA), na unda lo por presenta y bende peliculanan na entre otro companianan di distribucion.
Segun Aaron Hose, cu e aña aki ta encarga cu programmacion di e festival, esaki lo ta un factor importante pa trece un otro tipo di turista afluente na Aruba. “Cumpradornan y bendedornan di pelicula cu den dia lo participa den e conferencia y den otro oranan lo explora nos isla. Asina nos ta yuda crea un grupo nobo di bishitantenan cu ta bin bek cada aña”, segun Hose, cu ta bisa tambe cu e aña aki lo enfoca hopi tambe riba contenido di e programacion.
Jonathan Vieira
Hunto cu director di evento Rebecca Roos y CFO Frits Israel, Hose e ta forma e directiva nobo di AIFF. E nomber cu falta ta esun di fundador Jonathan Vieira. Na 2013, e ultimo edicion di AIFF a tuma lugar despues di un edicion na 2012 den cual a añadi un serie di concierto grandi cu a hinca Vieira particularmente den un debe miyonario. Esaki a causa cu pa e siguiente edicion, ATA a descontinua su patrocinio anual. Apesar di esaki e organisacion a logra di organisa un festival riba un escala mas chikito y na un localidad nobo. Sinembargo ora a sali na cla cu gobierno lo no patrocina e edicion di 2014 tampoco, a dicidi pa no organisa un AIFF e aña ey. Na cuminsamento di aña aki, presidente di ATA Ronella Tjin Asjoe-Croes a duna di conoce cerca prensa local cu ATA y AIFF tabata na mesa cu otro atrobe pa yega na un acuerdo riba patrocinio.
Na momento ey Croes a bisa cu ATA lo tabata kier mira cambionan den e organisacion pa loke ta entre otro tambe e posicion di Vieira, pa por tin e confiansa pa patrocina AIFF un biaha mas. Na final a yega na un acuerdo. “Jon ta keda nos co-fundador, pues den e sentido ey e ta keda envolvi y su contribucionnan ta keda clave. Pero su prioridad personal ta pa paga tur cuenta cu ta habri ainda di 2012, mientras cu e resto di e team ta enfoca riba e edicion di 2015 y posibel edicionnan den futuro”, segun Hose.
Menos placa
E suma cu ATA ta duna AIFF ta casi mitar menos cu e mey miyon dollar di añanan anterior, 280.000 dollar pa ta exacto, asina presidente di ATA ta laga sa. “Tin management nobo y nos kier aserca e evento aki cu cautela, aunke cu e parti di film festival a score bon semper pa loke ta relacion publico pa Aruba. Tin un management fuerte y experto. Mira esaki mas bien como confiansa di ATA den e evento aki”, segun Ronella Tjin Asjoe-Croes.
Autor Ariën Rasmijn