Minister Plasterk i Clark Abraham – potrèt: Pieter Hofmann
DEN HAAG – Awe na Den Haag a sera e siman di Hulanda Karibense. Hulanda a firma dos plan di vários aña, un ku Saba i un ku Boneiru. Sint Eustatius a retirá for di e deliberashon i tabata ousente ora di firma. Ayera Reino a pone Sint Eustatius bou di kuratela pa motibu di un défisit den presupuesto.
Minister di Asuntunan Interno i Relashonnan den Reino Ronald Plasterk ta papia di ‘kombersashonnan pika’ ku Boneiru. E isla a rekordá Hulanda di tene su mes na palabrashon ku a hasi anteriormente. Den Haag mester paga e mantenshon di infrastruktura di Boneiru, pero te awe nan no a paga.
Entretantu a rekonfirmá e palabrashon aki di 2010.E aña aki Hulanda ta invertí tres mion dòler den infrastruktura pa kuminsá alkansá esaki, Plasterk ta bisa. Prome ku fin di aña gobièrnu na Den Haag lo tuma un posishon kon mester ehekutá e palabrashonnan.
Lider di delegashon Clark Abraham por lo pronto ta trankil. “Tres mion den seis luna no ta tiki. Nos lo duna gobièrnu hulandes tempu i nos lo warda nan punto di bista. Abraham ta satisfecho tambe ku a primintí su isla 10 mion dòler pa kombatí pobresa.
Invershon
BZK na 2015 i 2016 ta invertí 495 mil dòler pa desaroya ekonomia bonerianu, tambe e ministerio lo paga 1.6 mion dòler pa trata ku problemasia sosial-ekonómiko. Ministerio di Infrastruktura i Medio Ambiente (I i M) ta paga 3 mion euro pa trata barionan i 9 mion pa haf. Diputado di Desaroyo Espasial Gerald Silberie ta ferwagt ku su isla por kuminsá dal bai e aña aki mes ku esaki.
Minister Plasterk i e delegashon sabano – potrèt: Pieter Hofmann
E lider di e delegashon sabano Chris Johnson ta satisfecho ku e resultado di e siman di HK. Su isla ta haña 6 mion dòler pa mantenshon di e kaminda pa bai haf. For di 2016 sueldu mínimo lo subi ku 6.5 porshento. Tambe BZK lo paga 180 mil dòler na 2015 i 2016 pa desaroyo ekonómiko i 600 mil dòler pa solushoná problemanan sosial ekonómiko.
Previshon sosial
Hulanda ta paga mas tantu na previshon sosial den Hulanda Karibense. Na 2016 a reservá 900 mil dòler pa plaka pa yu. Islanan BES lo haña strukturalmente 300 mil euro mas di ministerio di Asuntunan Sosial i Empleo (SZW) pa kombatí pobresa. SZW lo subi e nivel di ònderstant spesial tambe pa e nivel di sueldo mínimo.
Outor Pieter Hofmann